1 ታ ኢሻቶ፥ ታኒ ኦዴይ ሂጌ ኤሪያ ኣሳታሳ። ሂጌይ ኢሲ ኣሲ ፓፃ ዴዒያ ዎዴ ኡባን ኢያ ሃሬስ። 2 ሌሚሶስ፥ ኣዚና ጌሊዳ ማጫሲያ ኢ ኣዚናይ ፓፃ ዴዒያ ዎዴ ሂጌን ኢያራ ቃሼታሱ። ሺን ኢ ኣዚናይ ሃይቂኮ ኢያራ ኢያ ጫቂዳ ጫቆይ ኢዮ ሃሬና። 3 ሄሳ ጊሾ፥ ኢያ ባ ኣዚናይ ፓፃ ዴዒሺን፥ ሃራ ኣዴ ጌሊኮ፥ ኢያ ላሚዳሮ ጌቴታዉሱ። ሺን ኢ ኣዚናይ ሃይቂኮ፥ ጫቆይ ኢዮ ሃሮና ጊሾ ኢያ ሃራ ኣዚና ጌሊኮ፥ ኢያ ላሚዳሮ ጌቴቱኩ።

4 ሄሳ ጊሾ፥ ታ ኢሻቶ፥ ሂንቴ ኪሪስቶሳ ኣሳቴꬃ ባጋራ ሂጌ ዎልቃስ ሃይቂዲ፥ ፆሳስ ኣይፌ ኣይፋናው ሃይቆፔ ዴንዲዳ ኪሪስቶሳስ ጊዲዴታ። 5 ኑ ኣሾ ኣሞይ ኑና ሃሪን፥ ኑ ዴዒያ ዎዴ ሂጌይ ጉጂ ናጋራ ኦꬃና ሜላ ኑና ዴንꬄꬄስ። ኑ ኣሳቴꬃ ጊዶን ኢታ ኣሞቴꬂ ዴዒያ ጊሾ ኑኒ ሃይቆ ኣይፌ ኣይፋና ሜላ ኦꬂስ። 6 ሺን ሃዒ ኑኒ ኑና ቃቺዳ ሂጊያስ ሃይቂዳ ጊሾ ኑኒ ሂጌ ቃሾፔ ቢሌቲዳ። ሄሳ ጊሾ፥ ጌሻ ኣያና ኦጌን ፆሳስ ኪቴቶሲፔ ኣቲን ፃፌቲዳ ጪማ ሂጊያስ ኪቴቶኮ።

7 ያቲን፥ ኑኒ ዎይጋኔ? ሂጌይ ባ ሁዔን ናጋሬ? ጊዴና! ሺን ሂጌይ ናጋሪ ኣይቤኮ ታና ኤሪሲስ። ሂጌይ፥ «ኣሞቶፋ» ጎናኮ፥ ኣሞቴꬂ ኣይቤኮ ታኒ ኤሪኬ። ኬሳ 20፡17፤ ዛሬ 5፡21 8 ሺን ታ ኡባባ ኣሞታና ሜላ ናጋሪ ሂጌ ባጋራ ታናን ኦጌ ዴሚስ። ሂጌይ ባይኔኮ ናጋሪ ሃይቂዳይሳ።

9 ካሴ ሂጌይ ባይና ዎዴ ታ ፓፃ፥ ሺን ሂጌይ ኢሜቲዳ ዎዴ ናጋሪ ፓፂን ታ ቃሲ ሃይቃስ። 10 ታኒ ዴዖን ዳና ሜላ ፆሳይ ኢሚዳ ሂጌይ ታው ሃይቆ ኤሂስ። 11 ናጋሪ ሂጌ ባጋራ ታና ጪሚያ ኦጌ ዴሚዲ፥ ዎꬊስ። ሜꬌ 3፡13

12 ሄሳ ጊሾ፥ ሂጌይ ጌሺ፤ ኢያን ፃፌቲዳ ኪታይካ ጌሺ፥ ፂሎኔ ሎዖ።

13 ያቲን፥ ሎዖ ጊዲዳባይ ታ ቦላ ሃይቆ ኤሂዴዬ? ጊዴና! ሺን ናጋሪ ናጋራ ጊዴይሲ ቆንጫና ሜላ ሎዖባን ማዴቲዲ ታው ሃይቆ ኤሂስ። ሄሳ ጊሾ፥ ናጋራ ናጋራቴꬃይ ሂጌ ባጋራ ኣꬊዲ ኤሬቲስ።

14 ኑኒ ሂጌይ ኣያናባ ጊዴይሳ ኤሮስ። ሺን ታኒ ናጋራስ ባይዜቲዳ ኣሾ ኣሲ። 15 ታኒ ኦꬂያባ ኣኬኪኬ፤ ታኒ ዶሲያባ ኦꬃናይሳ ኣጋዳ ታ ኢፂያባ ኦꬃይስ። ጋላ 5፡17 16 ታኒ ኢፂያባ ኦꬂያባ ጊዲኮ፥ ሂጌይ ሎዖ ጊዴይሳ ማዓይስ። 17 ሄሳ ጊዲኮ፥ ሄ ኦሱዋ ታናን ዴዒያ ናጋራይ ኦꬃይሲፔ ኣቲን ታ ኦꬂኬ።

18 ታናን፥ ሄሲካ ታ ኣሹዋን ሎዖባይ ባይናይሳ ኤራይስ። ሎዖባ ኦꬂያ ኣሞቴꬂ ታናን ዴዔስ፥ ሺን ሎዖባ ኦꬃናው ዳንዳዒኬ። 19 ታኒ ኢፂያ ኢታባ ኦꬃይሲፔ ኣቲን ታ ዶሲያ ሎዖባ ኦꬂኬ። 20 ታኒ ኢፂያባ ኦꬂያባ ጊዲኮ፥ ሄሳ ታናን ዴዒያ ናጋራይ ኦꬄሲፔ ኣቲን ኦꬄይ ታና ጊዲኬ።

21 ሂዛ፥ ታ ሎዖባ ኦꬃናው ዶሲሺን፥ ኢታባ ኦሶይ ዎጋ ጊዴይሳ ዴማስ። 22 ታኒ ታ ዎዛናን ፆሳ ሂጊያን ኡፋይታይስ። 23 ሺን ታ ኣሳቴꬃ ጊዶን ዴዒያ ታ ቆፋ ሂጊያራ ኦሌቲያ ዱማ ሂጌ ቤዓይስ። ሄ ሂጌይ ታ ኣሳቴꬃ ጊዶን ኦꬂያ ናጋራ ሂጊያስ ታና ኣይሌ ኦꬂዲ ኢሚስ። 24 ታኒ ዋኒዳ ዪባታ ኣሴ? ሃይቆስ ኤፊያ ሃ ኣሳቴꬃፌ ታና ኣሻናይ ኦኔ? 25 ኑ ጎዳ ዬሱስ ኪሪስቶሳ ባጋራ ታና ኣሺያ ፆሳስ ጋላቲ ጊዶ።

ሂዛ፥ ታኒ ታ ቆፋን ፆሳ ሂጊያስ ሃሬታይስ፤ ሺን ታ ኣሳቴꬃን ታና ናጋራ ኦሲሲያ ሂጊያስ ሃሬታይስ።