1 Mãwãnacarea Daviba nãwã crĩchasia: “Ewari ab̶a Saulba mʌ̃ra beaya. Biara b̶ʌa mʌ̃ra pilisteorã druad̶aa mĩrũ wãida. Mãwãra Saulba mʌ̃ra beai carea naʌ̃ Israel druad̶e waa jʌrʌẽ́a. Mama idjia mʌ̃ra poya jidaẽ́a.”

2 Ara maʌ̃da Davira, seisciento sordaorã idji ume panʌ sid̶a pilisteorã puru Gat abadad̶aa wãsid̶aa. Maʌ̃ puru borora Maó warra Aquisi basía. 3 Maʌ̃ne Davira, idji sordaorã sid̶a ãdji ẽberãrã bara Aquisi caita Gat purud̶e panesid̶aa. Daviba quimada umé erob̶asia. Ab̶a Ahinoaʌ̃ basía. Ahinoaʌ̃ra Jezreel purud̶ebema basía. Dewarabemara Abigail basía. Abigailera Carmel purud̶ebema basía. Idjira Nabal pẽdra wẽrã basía. 4 Saulba ũrĩsia Davira Gat purud̶aa mĩrũ wãsida. Maʌ̃ bẽrã Davi beai carea waa jʌrʌẽ́ basía.

5 Ewari ab̶a Daviba Aquisia nãwã jarasia:

–Bʌa mʌ̃da bia unu b̶ʌbʌrʌ, bʌ druad̶e puru zaqueda ab̶a mʌ̃́a diadua dai panani carea. Mʌ̃, bʌ nezocara bʌ puru dromane b̶aiẽ́ b̶ʌa.–

6 Ara maʌ̃ ewarid̶e Aquisiba Sicla puruda Davia diasia. Mamaʌba ʌ̃taa maʌ̃ purura Juda druad̶ebema bororãba eropanesid̶aa. 7 Davira poa ab̶a aud̶u jed̶eco quĩmãrẽ pilisteorã druad̶e b̶asia. 8 Mama panʌne Davira idji sordaorã ume gesuritarãmaa, gezritarãmaa, idjab̶a amalecitarãmaa bid̶a ne jãrĩcuad̶e wãbadjid̶aa. Maʌ̃ ẽberãrãra Telaiʌ̃ purud̶eba Sur ẽjũãare ab̶a Egipto drua daucha panabadjid̶aa.* Telaiʌ̃ purud̶eba. Ʌ̃cʌrʌmaarã maʌ̃ba jara b̶ʌa: “Drõã naẽnabema ewarid̶eba ʌ̃taa.” 9 Ne jãrĩcuad̶e wãbʌdad̶e Daviba idji sordaorã ume umaquĩrãrãda, wẽrãrã sid̶a jũma quenabadjid̶aa. Ni ab̶aʌda zocai b̶ʌd̶aca basía. Baribʌrʌ ovejada, pacada, burroda, cameyoda, cacuad̶e jʌ̃bada sid̶a jũma edacuad̶aped̶a Aquisimaa jẽda wãbadjid̶aa. 10 Maʌ̃ne Aquisiba nãwã iwid̶ibadjia:

–Id̶i bãrãra ¿sãma ne jãrĩcuad̶e wã panasid̶a?–

Maʌ̃ne Daviba sewad̶eba nãwã panubadjia:

–Negue ẽjũãne Juda druad̶e Jerameeld̶eba yõped̶ad̶arãba eropananada, quenitarãba eropanana sid̶a jãrĩcuad̶e wã panasid̶aa.–

11 Ne jãrĩcuad̶e wãbʌrʌd̶e Daviba umaquĩrãrãda, wẽrãrã sid̶a jũma quenabadjia. Ni ab̶aʌda zocai b̶ʌca basía. Idjia nãwã crĩchasia: “Ab̶aʌda zocai b̶ʌsira maʌ̃ne idjira Gat purud̶aa zeibʌrʌ Aquisia jaraisicada mʌ̃a od̶ada.” Davi pilisteorã druad̶e b̶asid̶e mãwã o b̶abadjia. 12 Maʌ̃ carea pilisteorã boro Aquisiba crĩchasia Davira idjiare b̶ʌda. Idjia jarasia: “Daviba o b̶ʌ carea idji puru Israelba idjira quĩrãma panʌa. Maʌ̃ bẽrã idjira ewariza mʌ̃are b̶aya.”