1 In fiqui duque quereintsan fiqui joe: Jesucrístochi tsachila tala mantá tan pejochi timinla sen trabajo cachi timinla joe. Ya fiqui tsarasi fiqui joe. 2 Jesucrístochi tsachila tala mantá tanla mantimini sen tsachila jonola joe. Culpa quituntsan jonola joe. Mancasiri sona tan, layan cuchitumin, tenca tan, respetainun, facaricamin, micarino poden jonola joe. 3 Winan itumin, quicaatumin, encanato cala tarinno muna iton, wantaimin, paito patumin, calaca layan munaiton jonola joe. 4 Yalachi yabi pechuminlaca seque mantaquin, tencachique nalalaca merása carin, jera respetaisa carin, quimin jonola joe. 5 Yabi pechuminlaca seque mantano podeitutori, Diosichi familia cuwenta junlacanan cuidaino podeilaituchunae. 6 Aman casan Jesucrístobe cayaicalaca mantá tan suwatuntsan joe. Tsan suwanari, fe joyoeque tenca calaquichunae yucan cuwenta. Junni yucan cuwenta casticailaichunae. 7 Jesucrístoca quereituminlari ya mantá tanlaca culpa patarino podeinari, yucan yalaca jutsa manquisa carino podeichunae. Jun tenchi mantá tano junla jeralela se tinun jonola joe.

8 Weyanla Jesucrístochi tsachi bolon tenchi trabajaquiminla jochunae. Junni yalanan sen tsachila jonola joe. Epele patumin, nene patumin, layan cuchitumin, encanato cala tarinno muna iton jonola joe. 9 ¿Chiquila quereinun fiqui casale miitunun jotonan, amanari miranun fiqui joco? Junni ya trabajaquiminlari ya sen fiquica seque quereinola joe jun fiquibe sen tenca joyoeque tenhito. 10 Casale Jesucrístochi tsachi bolon tenchi trabajaquimin ino junlaca quirato miintsan jochunae. Culpa quituntsan sen jominlachiri jun mantaca cuwantsan joe.

11 Sonalanan sen jonola joe. Epele patumin, yucacuratumin, layan cuchitumin jonola joe. Ti quino jonuncatiya peleituto seque quimin jonola joe.

12 Jesucrístochi tsachi bolon tenchi trabajaquiminlari mancasiri sona tan jonola joe. Yalachi nalalaca, yalachi yaca seque mantamin jonola joe. 13 Jesucrístochi tsachi bolon tenchi seque trabajaquiminla fécari respetainun ilaichunae. Yalari Jesucrístoca quereito nenachun, fécari tenca tan joyoeque tenhilaichunae.

14-15 Timoteo, nuchica wewe jino munarayoe. Junni pansile we jituichunaeque in pilabi nuca micarinayoe. Tsanque la cajatusanan, miino podeino jochunae Diosichi tsachila tala niyaque nenanola jonunca. Son Diosichi tsachila layaito yachi familiala jolajoyoe. Diosichi tsachilari yachi sen fiquica pato micariminla joyoe. Chiquilabesiri jun fiquica miintsan joe. 16 Junni chiquila quereinun fiquiri tsaracari merántsan fiqui joe. Tsachila miitonunca Diosi chiquilaca miisa carie. Yari itsanque joe: