JIDAQUE QUISARATI LUCASRA HUENECUAREQUE
LUCAS
Riyaque quiricari Lucasra huenecuare. Casamati pujitu jucuare. Turatu Pablo tajicuare Jesúsja jidaque quisarati cueja juyaju.
Turatu Jesús ECUITA jadya cuejae acuare. Huenecuare tujatu Jesúsja ujejeda cuana tsehue canerecabati anicuareque, ujejeda cuanaque chachanecuareque, ijahua cuanara quijahuatishaya cuanaja ijahua cuana ijehuecuinacuareque jadya.
Tumebaedyatu Lucasra ejitaju acuare Jesús YUSUJA EBACUAQUEque. Huenecuare tujatu Jesús Yusuja casa eque eje bucha jucuareque. Tumebaedya tujatu huenecuare Jesúsra bahuityacuareque. Riyaque quiricajuri umada huenetanacuare Jesús eje bucha jucuareque, tura bahuityacuareque peya quirica cuana Mateora, Marcosra, Juanra jadya huenecuare cuanaju aijamaque.
Riyaque quiricajuri ehuene aniya:
Juan Ecuita Cuana Utsaquique cuinanacuareque (capítulo 1)
Samaria juque ecuita jidara israelita ujeda eaque tsahuacuareque cuatsabiji (cap. 10)
Ebacuaquera etataque jacacuareque cuatsabiji (cap. 15)
Chipirudaque, Lázaro jadya eje bucha jucuareque cuatsabiji (cap. 16)
Peadya tunca ecuita pusesera ririshayaque Jesúsra chachanecuareque (cap. 17)
Fariseo, enaruquija ishu chipiru sitaquique jadya Yusu tsehue quisaraticuareque (cap. 18)
Zaqueo Jesús queja catyatitsu inime cacuareticuareque (cap. 19)
1
Catibuti ishuque quisarati
1 Riya micue quirica cuadishaya, Teófilo. Hueneya rique quirica mique Jesucristo eje buchique bahue amere ishu. 2 Umaeratu amena huenecuaredya Jesús eje bucha riyaque yahuaju junahuaque. Jadique quisarati huenema jarique tuna tura mepehua cuana tsehue, tuque eje bucha juyaju petaqui jucuare cuana tsehue, jadya tuna quisaraticuare. Eje bucha juhuaque pana bahue juatsu piisi tunajatu huenecuare tuque jucuare cuanaque. 3 Eratu adebacuare dutya inime eque, inime tsapema tsehue catibutihua eque terediruya tupu. Jidadya tuque adebaya riya cuanaque huene ishu, mique ecue dyaque iyuhuedaque Teófilo. 4 Hueneya tuque micue era riyaque cueja, mique tunara bahuityacuareque, pusha ama cuitadya yunerique mique bahue juishu.
Barepaju Yusu tsahuaquira Juan Ecuita Cuana Utsaquique cuinanayaque cuejanacuareque
5 Teófilo, icuene mique cuejaya Zacarías ehuaneque Elisabet tsehue eje bucha jucuareque. Herodes Judeaju enaruqui jucuare patyatu jadya jucuare. Israel eque ejuracanaquetu Zacarías bacani jucuare. Paetu jucuare. Abías cuare juquetu jucuare. Tuja ehuanequetu Elisabet bacani jucuare. Tumeque epunatu jucuare pae israelita Aarón bacani eque ejuracanaque. 6 Betadya tatse tuyu jucuare Yusuja yacuaju. Tatse tatse anicuare Yusura cuatsashahua eque. Jadya tibu tatse ni ejeradya jutidya ni aiju jucha metse jadya acuare ama. 7 Bacuama tatse jucuare, Elisabet cabacuati baecua juya tibu. Betadya tatse amena esiri jucuare.
8 Jadyatu jucuare Zacarías queja inime, tuque Yusuja etareju mere juyaju. Quimisacarucu huecaca cama tunajatu mere ishuque jucuare. 9 Pae cuanaja bahue tunajatu peadya tuhuaque mepe bahue junenicuare muru ijimedaque pahua ishu Yusuja etareju Muida Cuitaque Amaju. Tume tunajatu Zacarías mepecuare muru ijimedaque pahua ishu. 10 Tura muru ijimedaque pahuayajutu jetiama ecuita caradatihua cuanaque etare tsecue Yusu tsehue quisarati bahue jucuare. 11 Tumetu Zacarías queja cabamereticuare barepa juque Yusu tsahuaquique Yusura cuadishayaque. Tumu mesa tunara muru ijimedaque pahuati bahuejutu jida eque amaca netinacuare. 12 Tuque baatsutu Zacarías ana ajacatacuare. Dyaque bajidatu jucuare. 13 Yusu tsahuaquiratu isaracuare:
—Zacarías, bajida juume. Yusura tuque micue quisarati bacahua. Ayadya tujatu mira bacahua equedya. Micue huane Elisabet tu cabacuatiya. Peadya ebacua tujatu adadiya. “Juan” tuja ebacani paju. 14-15 Mique, tumebaedya peya cuana jadya micuana pureama jubuque ebacua nana cuinanahuaju. Dyaque jida micuana jubuque, Yusura ecuita dyaque inime metseque bucha baya tibu. Turatu ijibuque ama uva nacaca esasanashaque ni peya nijuqui ishuque. Tuque cuinanama jarijudyatu Yusuja Espíritu tuatsehue jubuque. 16 Turatu jetiama israelita cuana inime cacuaretishabuque, Yusu iyuhueda bamere ishu. 17 Ecuana Cuatsashaquira Yusuja quisarati cuejatibunema jarijutu micue bacuara jadya cuejabuque: “Nequihuaticue, Ecuana Cuatsashaquique junayaju ishu”. Tujatu tumeque casadya anibuque Yusu equeque quisarati cuejaquique beru Elías jucuare bae. Yusuja Espíritu tu micue bacua tsehue jubuque, béru Elías tsehue jucuare bae. Micue bacuaratu etata cuanaque queja ebacua cuanaque iyuhueda bamerebuque. Turatu Yusu adeba baecua cuanaque Yusu iyuhueda amerebuque. Jadya bajejee tujatu abuque ecuita cuana, Ecuana Cuatsashaquique jida tsehue batsa ishu, —jadyatu Yusu tsahuaquira acuare Zacarías.
18 Zacariasratu bacaduracuare Yusu tsahuaquique:
—¿Eje bucha adebae jatsu tuque eau yuneridya jadya juyaque? Esiri cuita dyadi taa ique, ecue ehuane bacue tumebaedya, —jadya tujatu acuare.
19 Yusu tsahuaquiratu quemitsacuare:
—Ique Gabriel bacani; dutya huecaca Yusuja yacuaju tuque mere juyaque ique. Turadya cuadishahua mique isara ishu, riyaque jidaque quisarati cueja ishu. 20 Era cuejahuaque mira ejenehua ama tibumi iyacua quisarati baecua juya. Quisaratijacaya mique, micue bacua cuinanaya tupu. Yuneridya, jadidyatu judadiya, —jadya tujatu acuare Zacarías.
21 Tuque jadya juya tsunumeetu jetiama ecuita etsecueju caradaticuare, Zacarías cuinanayaque ihua. Tume tuna cabacaduratibarecuare:
—¿Eje bucha juatsutu Zacarías tsunutaya?
22 Amena tuque cuinanaetitsu tujatu ecana isaracara datse acuare. Zacariastu quisaratitaqui ama cabaticuare. Anamatu jucuare. Adebacuaredya tunajatu Muida Cuita Amaju barepa juque ai cuana bahuaque. Emetucu tsehuedya jutidya tujatu ecana piyecuejacuare tura bahuaque.
23 Amena Yusuja etareju mere ishuque huecaca tuja terehuajutu Zacarías dirucuare tuja etareju. 24 Jadya juatsu tujatu ehuaneque Elisabet maqui jucuare. Pishica baditu cuinana baecua jucuare tuja etare juque. Inime tujatu jucuare:
25 —¡Yusutu dyaque jida eatsehue! Nerecabahua tura ique bacuamaque ebisuuju, —jadyatu jucuare.
Barepa juque Yusu tsahuaquira Jesús cuinanayaque cuejacuareque
26 Shucuta badi juhuajutu Yusura cuadishacuare tuque tsahuaquique Gabriel bacani Nazaret epu ebariju Galilea yahuaju. 27 Epuna ehue ebari María bacani deca baecua queja tujatu cuadishacuare. Tumeque epuna ehue ebarijatu anicuare caquemiti ishuque quisarati ecuita José bacani tsehue. Josétu jucuare ecuari David eque ejuracanaque. 28 Yusu tsahuaquiquetu nubiticuare María aniyaju. Nubitsu tujatu isaraticuare:
—Bandía, mama. Isaraya mique era. Yusu tu miatsehue dyaque jida. Tuquetu miatsehuedya. Turami mepehua dutya epuna cuana ducuque, —jadya tujatu aticuare.
29 Amena barepa juque Yusu tsahuaquique baatsu, tuja etsuri bacatsu tujatu eje bucha adebataquima, ni daditaqui inime bacuare. Tume tujatu inime jucuare:
—¿Eje bucha juatsu tura jadya isaranae aya? —jadyatu jucuare.
30 Tumetu Yusu tsahuaquira acuare:
—Bajida juume, María. Yusutu miatsehue dyaque jida. 31 Ejetsunue juatsu amami carecani isaqui juya. Peadya ebacua tuque micue cuinanaya. JESUS bacani acue. 32 Tuquetu dyaque inime metseque judadiya. YUSU DYAQUE CASADAJA EBACUAQUE bacanitu judadiya. Micue bacuatu Yusura ameredadiya ecuari, tuja ebabaque David amerehua bucha. 33 Cuatsashajacabuque ama tujatu israelita cuana. Terebuque ama tujatu ecuari juque inime, —jadya tujatu María acuare.
34 Tumetu Mariara acuare:
—Ique deca baecua. ¿Eje bucha cabacuatie ejuu? —jadya tujatu acuare.
35 Yusu tsahuaquiratu quemitsacuare:
—Yusuja Espíritu tu miaqueja junaya. Yusu dutya casa aniyarami jadya amereya. Jadya tibudyatu ebacua nana cuinanayaque YUSUJA EBACUAQUE bacani juya. 36 Tumebaedyatu micue ata Elisabetja cuinanayadya ebacua, arepa tuque esiri juya ama bucha. Tunara “cabacuati baecua” jadya ayaquetu amena shucuta badi maquique. 37 Aijamatu Yusuja ai ataqui amaque, —jadyatu Yusu tsahuaquira acuare.
38 Tumetu Mariara acuare:
—Yusu Ecuana Cuatsashaquira cuatsashaya eque juishuque ique. Paju taa mira ique cuejahua eque, —jadyatu Mariara acuare.
Tuque jadya cuejatsutu Yusu tsahuaquique dirunucacuare.
María Elisabet queja tarepera cuacuareque
39 Eje uma huecaca ama jadya juhuaque cuetihuajutu María cabajejetitsu cuacuare Judea emata epuju, Elisabet, Zacarías ecatse aniyaju. 40 Tuhua junatitsutu nubinaticuare tatseja etareju. Etareju nubinatitsu tujatu isaranaticuare tuja ata Elisabet. 41 Mariara jadya isaranatie ayajutu Elisabetja ebacua ecare cani juque bucucucuare. Jadya juyajutu Elisabet caadebaticuare Yusuja Espíritu tuatsehueque. 42 Tume tujatu María jadya acuare:
—Yusurami mepehua dutya epuna cuana ducuque mique peadya. Tuquetu miatsehue dyaque jida. Tumebaedya tujatu mepehua micue bacua cuinanadadiyaque, dyaque jida tuatsehue juishu. 43 ¿Ai jatsu ique, Ique Cuatsashaquija ecuaque eaqueja tarepera jeishu? 44 Mira isarayaju micue etsuri bacaya tsehuedya cuitadya tuque ecue ebacua nana ecarecani juque bucucuhua, pureama juatsu. 45 Miquemi dyaque jida, mique tyatana ana atahuaque tyatahua tibu. Yuneri cuitadyatu Yusura yana ahua equedya judadiya, —jadyatu Elisabetra atsacuare.
46 Tumetu María jerucuare Yusu pureama ayaque:
“Dutya ecue inime tsehue mique pureama aya, Yusu Ique Cuatsashaquique dyaque casadaque.
47 Mique Ique Inajacamerequiradya ducuta pureama amereya.
48 Mira jida tsehue mepehua.
Mique merequique jetiedyaque ique.
Riyaque huecaca eque amena dutyara:
‘María peadyatu aniya epuna Yusura mepehuaque, tuatsehue dyaque jida juishu’ jadya abuque.
49 Mique dutya casa aniyaquemi dyaque jida juhua eatsehue.
Miquemi juchama neri.
50 Micuetu nerecabajacanime ama mique muibaqui cuanaque.
51 Miquemi dyaque casada.
Casumitiya cuanara inime pireya cuanaquemi pana yuamatura aya.
52 Casada cabatiya cuanaque tuquemi casadama amereya.
Casadama cabatiya cuanaque tuquemi casada amereya.
53 Nerecada cuanaque tuquemi dutya tunara ai sareya cuanaque tyaya.
Chipiruda cuanaque bacuemi ecana ni ai buchique tyaya ama.
54 Micuetu tsahua bahue Israel eque ejuracana cuanaque, mique merequi cuanaque.
Ni eje tupu mira ecuana iyuhue tsehue bajacaya ama.
55 Jadidya tuquemi quisarati tyahua ecuanaja ebaba Abraham, dutya tuque eque ejuracana cuanaque jadya.
Tereya ama tuque micue ecuana tsehue ecuana nerecaba ishuque”,
jadyatu Mariara Yusu jeru eque acuare.
56 Quimisha baditu Maria Elisabet queja aniticuare. Jadya juatsutu dirunucacuare tuja etareju.
Juan Ecuita Cuana Utsaquique cuinanacuareque
57 Tumetu Elisabetja cuina ishuque huecaca jueticuare. Ejitajutu acuare peadya deca ebacua. 58 Yusu Elisabet tsehue dyaque jidaque bahue juatsutu tuja ata cuana tuaqueja cuacuare, “Dyaque jidatu Yusu miatsehue” jadya cuejara.
59 Ebacua nanaja cuinana huecaca catsurutiyajutu tuja ata cuana, tuque japadama aniya cuanaque jadya chine ishu cuejatanacuare. Tumeque huecacatu ebacua nana ecuita huitu biti tubutanacuare tunaja bahue Israel eque ejuracanaque jadya adebatae juishuque. Etataque “Zacarías” bacani datse tunajatu acara acuare. 60 Tume tuna ecuaque Elisabetra jadya acuare:
—“Juan” bacani paju, —jadya tujatu ecana acuare.
61 —¿Eje bucha juatsu? Aijama taa tu Juan bacani micue ata ni peadya, —jadya tunajatu acuare Elisabet.
62 Elisabetra “Zacarías” bacani acarama aya bacatsu, “ ‘Juan’ bacani paju”, jadya ayajutu ecuita cuanara emetucu tsehuedya jutidya ebacua nanaja etataque bacaduracuare:
—¿Ai bacani tuquemi amerecara aya? —jadya.
63 Tuja emetucu tsehue piye cuejatsu tujatu bacacuare aiju huene ishuque. Inatsatsu tujatu huenecuare, “ ‘Juan’ bacani paju”. Dutyara tunajatu bape ebari bacuare. 64 Jadya huenetsutu Zacarías quisaratitibunenucacuare. Quisaratinucatsu tujatu Yusu pureama atibunecuare.
65 Dutya tuque japadama aniya cuanaque tuna anajacatacuare. Tsapecuare tunajatu quisarati dutya Judea yahuaju emata cuanaju anitaya cuana queja Zacarías eje bucha juhuaque. Cuatsabiji tunajatu acuare, ebacuaqueja ebacani cuejatsupa amena quisaratinucaya jadya. 66 Dutya tumeque cuatsabiji jadya juhuaque bahue juya cuanara tunajatu bape bacacuare. Cabacaduratibarecuare tuna:
—¿Aitu judadibuque tumeque ebacua nana? —jadya tuna jubarecuare tuna cama.
Yuneridya tucuetu Yusu Ecuana Cuatsashaquira naruya, tsahuaya jadya aya eje tupu tuque aniya jari tupu.
Zacariasra jeru acuareque
67 Tumetu Yusuja Espiritura ebacua nanaja etataque Zacarías jerushacuare:
68 “Yusu Ecuana Cuatsashaquique, pureama ea jucue.
Miquemi Yusu ecuana Israel eque ejuracana cuanara muiyaque.
Emuita mique, ecuana Ijahua quejaque inajacamerera jehua tibu.
69 Mira tuque ecuanaja Ecuana Inajacamerequique casadaque cuadishahua.
David eque ejuracanaque tume.
70 Jadya tuquemi quisarati iyacuare mique eque quisarati cuejaqui cuana eque béru yuequedya.
71 ‘Inajacamerebuque micuana era dutya micuana bijidamaduraqui cuana quejaque, tumebaedya micuana ujeu baqui cuana quejaque.
72 Anibuque tuque ecue canerecabati micuana tsehue, micuana eque ejuracana cuana tsehue jadya.
Judadima ama amatu judadibuque era micuana eje bucha aana ahuaque’ jadya mira ecuana ahua.
73 Riyaque tuquemi quisarati tyacuare ecuanaja ebaba Abraham:
74 ‘Eratu mique eque ejuracana cuanaque cuinanashabuque tuna ujeu baqui cuana quejaque, tunaja ique bajida tsehue ama mere ishu.
75 Ecue cuanaque tuna amerebuque.
Tuyu tuna anishabuque ecue yacuaju’ jadya tuquemi Abraham tyaana acuare”,
jadyatu Zacariasra acuare tuque pureama ayaque.
Jadya quisarati au jadya juatsu tujatu anucacuare quisarati ebacuaque Juanja ishu.
76 “Miquemi ecue ebacua.
Miquemi Yusu ebarucue aniya equeque quisarati cuejaqui judadiya.
Ecuana Cuashatsaquique junama jarijumi tuque junayaju ishu ecuita cuana bajeje ishu jubuque.
77 Miratu cuejabuque micue ata cuana Yusura tuna inajacamerebuqueque, tunaja jucha cuana tillabuqueque jadya.
78 Yusura ecuana inajacamerebuque ecuana huecaquique junatsu, ijetira huecacayaju yahua udaya bucha huecaera.
79 Tura ecuana huecanaya ecuana apuda ducu aniya cuanaque, ecuana maju mubajacaya ama cuanaque.
Tura ecuana Yusu tsehue jida amerenucaya, tuatsehue ecuana eje bucha tsehue ama ani ishu”, jadyatu Zacarías jucuare jeru eque.
80 Ebacua nana bacue ariari juajecuare. Quinimetiajecuare. Amena ecuita juatsutu anicuare epu ebari japada anitaya cuanaju. Tuhuatu anicuare, tuja ata israelita cuana Yusuja quisarati cuejatibuneya tupu.