Gua Pha Samoythek Ro
BLIATHEK
Yaophi
Guaphasamoythek ro Blia rek pha jigigam hì ne Lug pha Muawie ji è jao pha jigigam ji ro. Hì pha jigigam ne Isu pha migiphothek è khi-èrek ne Ragung So mua srane Isu pha Mua Wie ji Jerusalem thiig shii, Judea nane Samaria thiig shii, chiih è, zab sohnyiak shii yao muii pha jigigam ji ro. (1:8) Hì pha phaluii ne Isu blia ne, Jewish pha branthek è jao bi srane sohjambling pha zab branthek shii de migi now pha blia pha phaluii zey ne um ro. Hì zey pha bran è Isu shii izai now pho ne Roman Bisiu shii awie pha rey yi pha blia asi pha, hì ne Jewishthek shii zen ne giang rey yi pha blia rone zey pha phaluii ro.
Bliathek Hì pha jigigam ne uomrang shii thang ne zey ne um ro. Hì ne Isu pha Mua Wie ji yao srane charch reykhlei ruii pha jigigam zey ne um ro. (1) Isu pha blia ne Jerusalem è jao pha nane Isu hamangkhliie dun dun pha jigigam zey ne um ro; (2) Phalesthin pha gai ithua hà de jao thog pha jigigam zey ne um ro; (3) chiih è, Meditheranean sohjambling nane Rom hà de yao thog pha jigigam zey ne um ro.
Hì pha Bliathek ne Ragung So ne Isu shii izai now phothek shii Ragung So mua pha inai shii thog srane bliathek rek pha jigigam zey ne um ro. Chiih è, charch nane charch pha dumuiithek shii athodang pha ragia rek phi pha thek de zey ne um ro. Ibi reyjong pha bliathek dinne yao srane Isu shii izai now phothek shii blu rek phi, chiih è, charchthek dog ne rai pha jigigamthek zey ne um ro.
Iliing shii um pha ji
Khagi saro phi (1:1-26)
a. Isu Masi ro idohhè pha muyung nane sbang (1:1-14)
b. Judas ro blang (1:15-26)
Jerusalem shii khagi (2:1; 8:3)
Judea nane Samaria shii khagi (8:4; 12:25)
Phaul ro bliathek (13:1; 28:31)
a. Blia rek pho ro igobi pha mulua (13:1; 14:28)
b. Jerusalem shii miley (15:1-35)
c. Nyichiieng pha blia pho ro mulua (15:36; 18:22)
d. Uomchiieng pha bliapho ro mulua (18:23; 21:16)
e. Phaul ne Jerusalem, gaesarea, chiih-è Rom hà phathegpho ro, (21:17; 28:31)
1
1 Gu ijak Theophilus:
Igobi pha guro jigigam ne Isu è awai bliathek rek ne jao pha inai ji nane awai miyao yua pha inai ji jao pha ji è 2 yiedang ne awai yi hamangkhung dun din dun pha inai thog dang pha jigigam ji zey ne um ro. Isu awai è guaphasamoy shii ai hamangkhung adun ba pha ibi shii Ragung So um ne yua marui. 3 Ai iy ched ne inai sawi liing shii hanyie è migi anow pho shii bajo si noh srane ai ne hòi din rone doh yi. Ji pha branthek de aishii si srane ai rog shii Hamangkhung-aphuii pha Sajathua chiang pha miyaothek de yao ne rai. 4 Chiih-è ithek ò rai ramuii shii, Isu è ithek shii hì pha muyung phi: “Jerusalem thoh ne khi hà de awuii dang rabo, jimagunde gu Aphuii miyao marui pha lasen ji mua yi pha khan ne rai iang bo. 5 Jon è nathek shii kho è khowo phi magunde, ìujia pha inai idoh è, nathek shii Ragung So è wo ruii phro.”
Isu shii hamangkhung noh dun
6 Guaphasamoy ne Isu rog si mage shii samoythek è Isu shii sai, “Ithong, na è sudoh phashud shii Sajathua pha ji ne Israelthek shii idoh phi din habey?”
7 Isu è ithek shii yao, “Ji pha inai ne gu Aphuii awai riichai è dashab rek ne ruiijong ro, ji-è, ji pha inai ne khuchung thog ruii phane nathek ne athieg chid phro. 8 Jimagunde, khuchung shii nathek è Ragung So mua ruii arone nathek ne blu um ne gu shii izai rone yao pha Jerusalem shii, Judea pho shii nane Samaria pho shii, chiih è zab pha sohnyiak pho shii khagi rek ruii phro.” 9 Ji è yao ched marui ne samoythek riigdang pha ji shii Isu ne hamangkhung hà riie ne dun dun. Chiih è, Isu shii ne sakhmiing jiang ne sand dun.
10 Samoythek è athodang pha hamangkhung hà hùii ne riig ramuii shii bran nyi ne yung imo guii srane hamblo shii ithek moe riu khlei ruii 11 srane yao, “Galileanthek, nyie rek ne thuh de nathek ne ichiih shii riu srane hamangkhung hà hùii ne riig ne rai phlei? Hì pha Isu ne khi è rek ne hamangkhung hà dun dun pha ji duiine dinne thadoh wuii din ruii pha doh ruii phro.”
Judas chiang samoy gua
12 Ji è yao pha yoi marui ne guaphasamoy ne Somarothek Phiing ji thoh marui srane Jerusalem, thiig bow è ìujia ruang pha ithua hà dun thog din. 13 1:13: Mth 10:2-4; Mrg 3:16-19; Lug 14; 16 Ithek rajan hà thog dang shii ithek ne awaithek rai pha ùgud hà dun dun. Ithek ne, Phithar, Jon, Jems nane Andrew, Philiph nane Thomas, Bartholomew nane Methiu, Jems Alphayus pha dufuii, Simon, thiig shii ilkhi rek pha, chiih è Judas Jems pha dufuii. 14 Ithek ne athodang pha khrab srane hò-amuiithek nane Isu pha amuii Mery nane Isu pha ikhuiithek rog shii sia ne rai gieng.
15 Inai ìujia rey pha idoh shii hanyie thek è Isu shii migiphothek ne weingjia è ichiig branthek maley dug shii, Phithar è jai srane yao, 16 “Gu ijakthek wo,” Ai è yao, “Jigigam shii nyie zey pha ji ne izai rey ruii phro, nyieliieshii Dawid Saja shii Ragung So è Isu shii zum yi pha Judas chiang chaig ne zey, ne ruii pha ji ne izai reyjong ro. 17 Judas de gethek rog shii um pha bran ro. Ai de gethek rog shii blia rek gieng pha gua pha bran ro.”
( 18 Bang rog shii Judas ne awie pha blia rek ne raig pheg ne ruii. Ji pha raig shii awai zun ne iy dun srane iy pha siu de zab shongphleg ne chiih dun. 19 Ji è rek ne iy pha mua ne Jerusalem phothek de yoi dun. Ji-è ji pha raig ne awaithek pha nyuak è Akheldama beng ne ruii. Ji pha ibeng ne “Ifai pha raig rone beng ne ruii ro.”)
20 Sthun siog shii zey ne um,
“Yangne ai hò ne suloi rey dun phro;
yangne ji pha hò shii ne hanyie de arai phi phro.”
Chiih è, hì de zey ne um ro,
Yangne bran gai è ai blia rek maphi phro.
21-22 Ji zey pha duiine ai chiang è bran jia Isu hòi din pha miyao yao ne lua pha gethek rog shii dog gieng chid phro. Ai ne gethek rog shii um gieng ne Isu è gethek rog luagieng pha zab khagi pha è jia gua chid phro. Ai ne Jon è khowo phi pha mua yao pha è yie dang ne Isu shii hamangkhung noh dun pha thek thieg pha bran gua chid phro.
23 Ji yao ched ne ithek è Joseph, hanyie shii ithek è Barsabas rone ho, chiih è shak shii, Justhus de ho pha bran nane Mathias rone ho pha bran nyi shii gua phi. 24-25 Ji è gua ched srane ithek è Ithong shii sia ne sai, na ne branthek pha munow zab thieg pha Aphuii ro, ji-è, gathek shii yua phi bo, hanyie yi Judas è thoh marui ne awai ithua shii dun dun pha ithua shii gua ne samoy rek yi pha um ga? Ji è sia ched srane ithek è miiran riig shii, ji pha miiran ne Mathias pha ibeng khia khlei ruii, 26 Ji-è, ithek è Mathias shii Judas pha ithua shii guaphasamoy snajia rog shii gua ne ruii phi.