2
Bodaatsts kasho korbodek'etwok'o b́ iztsok'o
1 Eshe no shishts keewatse shortarr no dihirawok'o no shishits keew man jango sheengsh kordek'o noosh geyitwe. 2 Melakiwots weeron keewets aap'o arik wotwtsere, keewan finats jiitsrawonat keewmansho alerawo bísh wotit fayo daatsre, 3 Eshe, no kashts kash een wotts keewan no aatsnitka wotiyal aawk'oneya b́ shirotse keshosh nofaliti? Kashaanowere shin shin shishiyo dek'tuutso b́ tookon doonzoniye, bíyoke shishts ashuwotswere ar b́wottsok'o danirne. 4 Ik'onwere dabt milkiton, adits keewon, k'osh k'osh aditswotsi woshonat b́ shunok'o b́ imts shayiri S'ayin weeron bo gawts gawo kup'shre.
Ash naaro kasho maantsan jishituwo Iyesusi b́wottsok'o
5 Ik'o shinomaants weet datsu, no bjango nokeweyiru melakiwots bin boosh kewiratse 6 Dab́ S'ayin mas'aafwotsitse ikoke hank'o eteere,
«Nee bín n gawitwok'osh asho eebi?
Bo kis'o n detsetwok'o ash na'o eebi?
7 Melakiwotsiyere muk'i ndashiyi
Mangonat údi zewdiyo b́ tookats n gedi* 2:7 Yoots kishon guut'ets bits ik ikwots «N kishi finats bín nnaashiyi» etirwo dabfno.
8 Jam keewo bí ali shirots n woshi.»
Jam keewo bí ali shirots b́ woshor, bí ali shirots woshraniyere b́ ooritso eegonwor aaliye. Ernmó and jam keewo b́ fa'ok'on bí ali shirotse b́ beyirwok'o andish b́borfetso be'afa'one. 9 Andomó muk' aawush melakiwotsiyere muk'i dashan teshts k'iri gond bek'o b́daatstsosh mangonat údi zewdiyo kurdek'tso Iyesusi bek'etwone, bí Ik'i s'aaton no únetssh k'irre.
10 Jam keewo bínat b́tookish azdek'ts Ik'o ay nana'úwotsi mangomants dowosh bo kashit weero jishitwo Iyesusi gond bek'on s'een b́ wotitwok'o b́woshi. 11 Ashuwotsi S'ayin woshitwonat b́weeron S'ayin wotts ashuwotswere nih iko nana'úwotsiye, manatse tuwtson Iyesus bonowere «T eshwotsiye» err s'eegosh jitseratse. 12 Mansh S'ayin mas'aafwotsitse
«N shúútso tieeshwotssh keewitwe,
Ashuwots bokakwetsokee botaalotse dubon neen uditwe» etre.
13 2:13 Isa. 8:17-18 Mank'o
«Taa bí ats t imneitiyo juwitwe» etre,
Ando aani
«Hamb eshe taanat Ik'o taash b́imts nana'awotsn hanok noone» etre.
14 Mansh nana'anots meetsonat s'atson detsk ash bowottsotse Iyesuswere bokok'o ash b́wotiye, man b́ k'alwere b́ k'irtsatse tuutson k'iratse al detstso dablosi t'afiyoshee. 15 Mank'o k'ir shati jangosh bo dúr jamo guuts wotat kéweyat beyirwotsi aaniy kewdek'oshee. 16 Iyesus shuno, melakiwotsi b́ woterawo, Abraham naaro tep'oshee. 17 Mansh jam keewo bí eshwots kok'o woto bísh geyife b́teshi, mank'oon ashuwots morro orowa etosh Ik'osh finosh amanetsonat maarts kahni naashwotsatsi k'aabo b́wotiye. 18 Bí b́ tookosh fadeyat gondo b́bek'tsotse fadeyrwotsi tep'o falitwe.