6
1 Ik'onton tohaat finirwotsi nowottsotse itdek'ts s'aato datsmec'ron oorik'r k'ayere etaat itn k'oniruwe. 2 6:2 Isa. 49:8 Ik'o,
«Taash wotts aawots nkeewo k'ebre!
Kashiyi aawotsowere neen tep'ree!» bí etirwotse
«Eshe hambe! wotts aawo andee, kashi aawonwere andee.»
3 No fino k'efeerawok'o ik keewon konshor t'ugo woteratsone. 4 Maniyere gond bek'ona, ono bek'ono, k'ic'onowere k'amefetsr Ik'osh finirwotskok'o notooko jam weeron t'intsituwone. 5 6:5 Wosh. 16:23 Ik'osh fintsuwotsi nowoto nokitsitwere jot'ewon, tipewon, noats tuuzeyiru dimbiron, finon maawon, tokr t'ut'onat s'oomiyonee, 6 Mank'owere s'ayinon, danon, k'amoon, doowoton, S'ayin shayiron jisheewonat bíats daro bítse aalts shunon, 7 ari aap'onat Ik' angone. Bín da'osh wotowa noatse k'arbazosh kes'i kac' wotts kááw fino no k'anonat giri kishon deshdek'etwone. 8 Mangosh wee ketosh, k'orewosh wee údewosh k'an dek'k noone, aretswotsi nowotefere, dirshtswotsi eteyi. 9 Danetswotsi wotefetsat danerawwotskok'o nowoti, k'irrne etefere hamb kashetswotsi wotat nodatseyri, no jot'eyaloru úd'eratsone, 10 Shiyano noats b́ bodaloru jam aawo geneúituwone, tuguretswotsi wotefetsat ayuwotsi gaaletso nowoshiri, eegoru deshawwots wotefetsat, jam keewo detsfone.
11 It K'orotosn beyiru ashuwotso! hamb, itsh kish dek'at keewurone, no nibonowere gawintsdek'at itsh k'eshrone. 12 Itna itshuno noosh baziyi bako no itsh bayatsone. 13 Niho b́nana'úwotssh b́keewfok'o tkeewre, noo nonibo gawunon k'eshde'er nogitsotse shisheyirwo itsh kish nokitstsok'o itwere mank'o noosh k'aluwere.
Amaneraw ashuwotsnton ikwotk'azo
14 Woteraw finon, amaneraw ashuwotsnton ikn s'andek'ayere, kááwonat morron awuk'o k'alrniya ikwoto bofaliti? Sháánonat t'aluwon towaar beyo aawk'oneya bofaliti? 15 Krstosnat Diyablosn aawuk'oneya ik woto bofaliti? Amantsonat amanerawonmó aawuk'oneya kod'ewo bofaliti? 16 6:16 Lew. 26:12; Hzk'. 37:27; 1 K'or. 3:16; 6:19 Ik'i maa S'ayino woteraw dozets ik'uwotsnton eeg ikwote b́detsi? Ik'onwere,
«T beyokonowere tiashuwots taalots woshituwe,
Bontonwere beetwe,
Taa boosh boko Izar Izeweri wotituwe,
Bowere ti ashuwotsi wotitúne»
ett b́ keewtsok'on no beyat beyiru Ik'osh S'ayin Ik' maa noone. 17 6:17 Isa. 52:11 Manats dabt doonzo hank'o etre,
«Bo dagotse galeyar keere,
Kim wotts keewo t'awik'ayere,
Taawere iti dek'etuwe,
18 6:18 2 Sam. 7:14; 1 Zen. 17:13; Isa. 43:6; Erm. 31:9 Taawere itnihi wotituwe,
Itwere t nungush nana'úwotsnat mááts nanaúwotsi wotitute,
Etre jam faltso Izar Izeweri.»