Luda yã takada kↄ̃n Bokobaru yão 2 YOHANA 1

YOHANA TAKADA PLAADEE

Yãpura kↄ̃n yenzio

1-2 Mamↄma gbɛ̃nsi, mámbe ma takada kɛ̀ kɛ̃̀ nↄgbɛ̃ kɛ̀ Ludaa sɛ̀nɛ kↄ̃n a nɛ́nↄ. Má yeazi yãpuraa guu, yãpuraa kɛ̀ kú wa guu, bensↄ̃ eégↄ̃ kúwao gurↄ píngi yãnzi. Mámbe madoro, kↄ̃n gbɛ̃ kɛ̀ aↄ̃ yãpuraa pì dↄ̃ↄnↄmɛ ń píngi. 3 De Luda kↄ̃n a Nɛ́ Yesu Kirisio gbɛ̃kɛɛ kɛare kↄ̃n sùuo, aↄ̃ a tó aafiao yãpura kↄ̃n yenzio guu.

4 Kɛ̀ má è a nɛ́ kenↄ kú yãpuraa guu lán De Ludaa dìɛwe nà, ma pↄↄ kɛ̀ nna maamaa. 5 Tia sa nↄgbɛ̃, mɛ́ɛ wɛ́ɛ kɛɛmma. Èe kɛ dokayã dufun mɛ́ɛ oonnɛro, yã kɛ̀ wá vĩ zaa káakumɛ. Wàgↄ̃ yekↄ̃zi. 6 Yenzin yɛ̀: Wàgↄ̃ dokayã kɛ̀ Ludaa dìɛnↄ kũna. Yã kɛ̀ Ludaa dìɛ pìn yɛ̀: Wàgↄ̃ kú yenzi guu lán á mà zaa káaku nà.

7 Gbɛ̃kɛkɛrinↄ dàgula anduna guu pari, aↄ̃è be Yesu Kirisi e mↄ́ gbɛ̃ntee ũro. Gbɛ̃ beee takanↄ nɛ́ gbɛ̃kɛkɛrinↄmɛ, Kirisi ibɛɛnↄmɛ. 8 À làakari kɛ, àton tó zĩi kɛ̀ á kɛ̀ kɛ pãro. À tó à a láada e papana. 9 Gbɛ̃ kɛ̀ vĩ̀ Kirisi yãdannɛlaa Luda dↄ̃ro. Gbɛ̃ kɛ̀ zɛ̀ kↄ̃n yã pìo De Luda vĩ kↄ̃n à Nɛ́o ń píngi. 10 Tó gbɛ̃ mↄ̀ yã dadaare, tó à yã beee kũnaro, àton à síro. Àton gbãakɛ kpá adeezi sero. 11 Zaakɛ gbɛ̃ kɛ̀ gbãakɛ kpàzi bà kú kↄ̃n à zaakɛnanↄomɛ.

Lɛ́zammana

12 Má yã vĩ pari mà oare, mↄde má yezi mà kɛ̃are takada guuro. Má tãmaa vĩ mà mↄ́ wɛ́ɛ kpáɛazi, wà yã o kↄ̃o wɛ́ɛdewɛ, lɛ wà pↄnnaa e àgↄ̃ papana. 13 N vĩ̀i kɛ̀ Ludaa sɛ̀ nɛ́nↄ ì kpàawa.