Bibeli Luayãtaalá Soũↄ 140

140

Wabikɛa gbɛ̃vãiↄ yã́ musu

1 Davidi lɛ.

2 Dii, ma si gbɛ̃vãiↄwa,

ma dↄ̃́a gbɛ̃́ pãsĩpiↄ yã́i.

3 Aaì yãvãi wàaipa ń sↄ̃ guu,

sòle lɛ́ ↄ̃ aaìↄ wɛ́ gↄↄpii.

4 Aaì ń lɛ́ kɛkɛ lán mlɛ̃wa,

an lɛgbɛ'iá sↄ̀gbala sɛwɛɛ.*

5 Dii, ńsu to gbɛ̃vãiↄ ↄkãao,

ma si gbɛ̃́ pãsĩpiↄwa,

aaì ↄzↄ̃amazi lɛkpaaĩ.

6 Waladepiↄ ɛyↄ̃̀mɛɛ,

aa filifilimbakpàmɛɛ,

aa baikpàmɛɛ zɛ́u.

7 Má ò Diiɛ: Ma Luan n ũ,

swã́kpa ma wɛ̃na wiii, Dii.

8 Dii Lua, ma Suabana gbãa,

ni ↄkumala zĩ guu.

9 Ńsu to gbɛ̃vãiↄ pↄeã zɛkɛo,

Dii, ńsu to an lɛkpaaĩ kↄ̃sɛo.

10 To gbɛ̃́ pↄ́ liaamaziↄ midɛ,

to vãi pↄ́ aalɛ o wí ń musu.

11 To tɛyↄ̃ wãa ɛ́lɛmá,

to aa si ɛ pↄ́ aa fↄ̃ bↄuo guu.

12 Ńsu to yã́siade zɛkĩi e dṹniauo,

to vãi aↄ gbɛ̃́ pãsĩ wɛ zɛsaiɛ.

13 Má dↄ̃ Dii ì yãnakpa wɛ̃nadeↄwa,

ì yãkɛkɛ taasideↄnɛ a zɛ́wa.

14 Gbɛ̃maaↄ mɛ́ aa n tↄbↄ,

nↄ̀sɛpuadeↄ mɛ́ aaↄ ku n kĩ́i.

*140:4 Lom 3.13