Bibeli Luayãtaalá Soũↄ 118

118

Gɛa Dii ua ń sáaukpaao

1 À Dii sáaukpa, asa a maa,

aà gbɛ̃kɛ láaa vĩo.

2 Isailiↄ o,

aà gbɛ̃kɛ láaa vĩo.

3 Aalona buiↄ o,

aà gbɛ̃kɛ láaa vĩo.

4 Aà vĩakɛnaↄ o,

aà gbɛ̃kɛ láaa vĩo.

5 Ma lɛzù Diizi ma yeelɛa guu,

ↄ̃ a wèa à ma gba dɛ̀ɛpookĩi.

6 Dii kumanↄ, vĩa a ma kũo,

bↄ́ gbɛ̃nazĩna a fↄ̃ kɛmɛɛi?*

7 Dii kumanↄ ma dↄnlɛde ũ,

má tidↄ ma ibɛɛↄlaɛ.

8 Naa Diizi maa dɛ

gbɛ̃nazĩna náaikɛala.

9 Naa Diizi maa dɛ

gbãadeↄ náaikɛala.

10 Bui píi lìamazi,

ↄ̃ ma ń kwɛ́ ń Dii tↄ́o.

11 Aa lìamazi ↄplaai ń zɛɛo,

ↄ̃ ma ń kwɛ́ ń Dii tↄ́o.

12 Aa fĩ̀a lán zↄdaↄwa,

ↄ̃ aa mìdɛ lán sɛ̃̀ tɛ́kũawa,

ma ń kwɛ́ ń Dii tↄ́o.

13 Aa ↄzↄ̃̀mazi pãsĩpãsĩ,

má ye lɛ́lɛi, ↄ̃ Dii dↄ̀malɛ.

14 Dii mɛ́ ma gbãa ũ, aà táasi mi lɛ́,

à gↄ̃̀ ma Suabana ũ.

15 À ma, kúkua dↄ gbɛ̃maaↄ bòou,

Dii ↄplaa gbãa zĩkɛ̀.

16 Dii ↄplaa dↄa musu,

Dii ↄplaa gbãa zĩkɛ̀.

17 Má gao, máↄ kuɛ,

míↄ Dii yãkɛaↄ galikɛ.

18 Dii ma swãgàga maamaa,

ãma i to ga ma sɛo.

19 À gbɛ̃́ suabaa bↄlɛ gbaↄ wɛ̃mɛɛ

mà gɛ̃ mà Dii sáaukpa.

20 Dii ua bↄlɛ kɛ,

gbɛ̃maaↄ mɛ́ ì gɛ̃u.

21 Ma n sáaukɛ̀ Dii, asa ń wèa,

n gↄ̃ ma Suabana ũ.

22 Gbɛ pↄ́ ɛ̃bonaↄ pãkpài

mɛ́ gↄ̃̀ gbɛↄ mide ũ.†

23 Dii mɛ́ bee kɛ̀,

ↄ̃ à kɛ̀wɛ̃ɛ yãbↄnsaɛ ũ.‡

24 Gↄↄ pↄ́ Dii dìlɛn kɛ.

Wà pↄnakɛu wà yáalↄ.

25 N yã́ na Dii! Wá suaba!

Suɛ Dii! Wá daɛ ń gòmio!

26 Báaaden gbɛ̃́ pↄ́ lɛ́ mↄ́ ń Dii tↄ́o ũ,

kua Dii ua wálɛ gbãakpanzi.§

27 Dii mɛ́ Lua ũ, à gupùwɛ̃ɛ.

À ba dↄdↄ sa'obↄↄwa,

í poo gbagbakĩizi.

28 Ma Luan n ũ, má n sáaukpa,

ma Lua, má n tↄbↄ.

29 À Dii sáaukpa, asa a maa,

aà gbɛ̃kɛ láaa vĩo.

*118:6 Ɛbɛ 13.6

†118:22 Luk 20.17, Zĩn 4.11, 1Piɛ 2.7

‡118:23 Mat 21.42, Maa 12.10-11

§118:26 Mat 21.9, Maa 11.9, Luk 19.38, Zãa 12.13