Bibeli Luayãtaalá Soũↄ 106

106

Isailiↄ ń duunaↄ oa Luaɛ

1 Àleluya!

À Dii sáaukpa, asa a maa,

aà gbɛ̃kɛ láaa vĩo.

2 Démɛ a fↄ̃ Dii yãzↄ̃ↄkɛaↄ oi?

Démɛ a fↄ̃ à aà táasilɛ píii?

3 Báaadeↄn gbɛ̃́ pↄ́ aaìↄ yãmaa kũa

aaìↄ yãkɛ a zɛ́wa gↄↄpiiↄ ũ.

4 Tó ńlɛ na kɛ n gbɛ̃́ↄnɛ,

ma yã́ aↄ dↄngu, Dii.

Tó ńlɛ ń suaba, ma wɛgwa,

5 kɛ́ ma baa e àↄ ku n gbɛ̃́ↄ namau,

mí pↄnakɛ ń bui pↄ́ ń sɛ̀ↄ,

mí ń táasilɛ n gbɛ̃́piↄ guu.

6 Wa duunakɛ̀ lán wá deziↄwa,

wa tàaekɛ̀ wa yãvãikɛ̀.

7 Kɛ́ wá deziↄ ku Egipi,

aai Dii dabudabukɛaↄ yãdao,

yãmaa dasi pↄ́ a kɛ̀nɛ́ↄ sã̀ńguɛ,

ↄ̃ aa swã́gbãakɛ̀ Ísia Tɛ̃a saɛ.*

8 Ń beeo à ń suabà a tↄ́ yã́i,

kɛ́ wà e a gbãa dↄ̃.

9 À gbãamↄ̀ Ísia Tɛ̃aɛ ↄ̃ gugii bↄ̀,

à sìńnↄ a ɛu, aa bùawà guwaiwai ũ.†

10 À ń bↄ́ ń ibɛɛↄ ↄzĩ,

à ń sí ń zangudeↄ gbãawa.

11 Í dà ń wɛ̀lɛpiↄla,

baa an gbɛ̃́ mɛ̀ndo i bↄo.‡

12 Ɔ̃ aa yã́ pↄ́ a ò sì,

aa aà táasilɛ̀.§

13 Ɔ̃ aà yãkɛaↄ sã̀ńgu gↄ̃̀ↄ,

aai aà dã aà lɛdamáo.

14 Aalɛ ń pↄblea bɛɛkɛ guwaiwaiu,

ↄ̃ aa Dii lɛwɛ sɛ̃gbãu we.*

15 À pↄ́ pↄ́ aa gbɛ̀awa kpàmá,

ↄ̃ à mɛ'ibabagyã zĩ̀má.†

16 Aa ĩ́isɛ̀ ń Mↄizio bòou

ń Aalona pↄ́ Dii aà dìlɛo.‡

17 Tↄↄlɛ wɛ̃̀aa à Datani mↄ̀,

à kũ̀aa Abilaũ ń a gbɛ̃́ↄwa.§

18 Tɛ́ sù an ìwaↄwa,

tɛ́vua kùlɛ gbɛ̃vãipiↄwa.*

19 Aa mↄ pì Olebu lán gáaenawa,

ↄ̃ aa kùlɛ ń dii pↄ́ aa kàsapiɛ.†

20 Aa Lua gawide lɛũkpakɛ̀

ń zù sɛ̃̀sona taao.‡

21 Lua ń suabà ↄ̃ aà yã́ sã̀ńgu.

À yãzↄ̃ↄkɛ̀nɛ́ Egipi,

22 à dabudabuↄ kɛ̀ Haũ buiↄ bùsuu,

à yã́ pↄ́ ì to vĩa ń kṹ kɛ̀ Ísia Tɛ̃ai.

23 À mɛ̀ á a gbɛ̃́piↄ midɛ,

ↄ̃ aà gbɛ̃́ Mↄizi aà zùukɛ̀,

a tò aà pↄ wèe, ↄ̃ i ń midɛo.§

24 Aa pãkpà ń pↄeã bùsui,

aa gì Dii yã́ síi.

25 Aa yã́kũtɛ̃kà ń zwã̀akpɛↄ guu,

aai swã́sɛ Dii yã́io.*

26 Ɔ̃ à ↄlɛ̀lɛnɛ́ à mɛ̀

á tó aa kwɛ guwaiwaiuɛ,

27 á tó an buiↄ lɛ́lɛ buiↄ guu,

í ń fãaa bùsu ń bùsuo.†

28 Aa nà tã́a Peoowa,

aa pↄ́ pↄ́ wà sa'òò pↄgɛↄwa sò.‡

29 An yãkɛaↄ Dii pↄ fɛ̃̀,

ↄ̃ gaga gɛ̃̀ńgu.

30 Finɛasi fɛ̀lɛ yã́pi tɛdɛ̀,

ↄ̃ gagapi zɛ̀nɛ́.§

31 Ɔ̃ Dii tò yã́ bↄ̀aànↄ na,

aà bàa kuaànↄ e aà buiwa.*

32 Aa Dii zafɛ̃̀ Mɛliba í kĩ́i,

ↄ̃ Mↄizi yã'ì azĩaɛ an yã́i.

33 Asa aa aà nↄ̀sɛ ↄ̃̀ↄkpàɛ̀ɛ,

ↄ̃ à yã'ò làasoosai.†

34 Aai bùsupideↄ kɛ kɛ́lɛkɛlɛ,

lá Dii dìlɛnɛ́wao.‡

35 Aa gↄ̃̀ kↄ̃gbɛ̃ↄ ũ ń buipiↄ,

aa ń ↄlɛsɛ̀.

36 Aa zↄblè ń diiↄnɛ,

ↄ̃ yã́pi ń sↄ̃ blè.§

37 Aa ń nɛgↄ̃ɛnaↄ dɛ̀dɛ sa'obↄ ũ,

aa sa'ò tã́aↄwa ń ń nɛnↄɛnaↄ.*

38 Aa yãesaideↄ kòlokpakpa,

an nɛgↄ̃ɛↄ ń ń nɛnↄɛpiↄ.

Aa sa'òńnↄ Kanaa bùsu tã́aↄwa,

ↄ̃ an bùsupi gbãlɛ̀.†

39 An yãkɛaↄ mɛ́ tò aa gbãlɛ̀,

an dàaↄ tò aa gↄ̃̀ Luaɛ káaluaↄ ũ.

40 Ɔ̃ Dii pↄkũmabↄ̀bↄmá,

a ye gbɛ̃́ pↄ́ a ń sɛ́piↄ gĩyãi lↄo.

41 À ń kpá buiↄwa,

an zangudepiↄ ikokɛ̀má.

42 An ibɛɛↄ wɛ́tɛ̃amↄ̀nɛ́,

aa ↄtↄ̃̀ↄlɛmá.‡

43 Ìↄ ń bↄ mↄ̀ↄmↄↄ,

ãma aa zɛ̀ ń ń swã́gbãaoɛ,

ↄ̃ an duuna dàńla.

44 Tó à ń wii mà,

ì taasi dↄ̃nɛ́ɛ.§

45 Aà bàakuańnↄ yã́ i sãaàguo,

ↄ̃ à nↄ̀sɛlìlɛ a gbɛ̃kɛ zↄ̃ↄ guu.

46 A tò gbɛ̃́ pↄ́ aa ń kũkũ zĩ̀zↄↄ ũↄ wɛ̃nadↄ̃̀nɛ́.

47 Dii wá Lua, wá suaba!

Wá bↄlɛ buiↄ guu, ní wá kãaa,

wí n tↄ́ pↄ́ kú adoa bↄ,

wí ĩ́anadã ń n táasilɛao.

48 Wà Dii, Isailiↄ Lua sáaukpa

za asĩnizĩ e gↄↄpii!

Gbɛ̃́pii mɛ, ãmi!

Àleluya!

LÁ SƆODE

Souↄ̃ 107-150

*106:7 Bↄa 14.10-12

†106:9 Bↄa 14.21-22

‡106:11 Bↄa 14.21-22

§106:12 Bↄa 15.1

*106:14 Nao 11.4-6

†106:15 Nao 11.31-33

‡106:16 Nao 16.1-3

§106:17 Nao 16.31-33

*106:18 Nao 16.35

†106:19 Bↄa 32.1-6

‡106:20 Lom 1.23

§106:23 Bↄa 32.10-14

*106:25 Nao 14.1-4

†106:27 Nao 14.26-35

‡106:28 Nao 25.1-3

§106:30 Nao 25.7-8

*106:31 Nao 25.10-13

†106:33 Nao 20.10-12

‡106:34 Iko 7.2

§106:36 Dↄa 3.5-6

*106:37 2Kia 17.17

†106:38 Nao 35.33-34

‡106:42 Dↄa 2.14

§106:44 Dↄa 2.18