Bibeli Luayãtaalá Soũↄ 44

44

Isailiↄ wɛ̃nakɛa

1 Kole buiↄ lɛ.

2 Lua, yã́ pↄ́ ń kɛ̀ wá deziↄ gↄↄ,

aa òwɛ̃ɛ wá swã́ mà.

3 N ↄpɛ̀ buipãleↄwa n ĩadàmá,

n wá deziↄ kàlɛ ń gbɛu aa ↄtàu.

4 An fɛ̃nda mɛ́ ń ká bùsupiwao,

an gã̀sa gbãa ↄ̃ aa zĩblèòo.

N zĩa gã̀sa gbãa mɛ́ kɛ̀,

n kuańnↄ gupùnɛ́, kɛ́ ń yeńzi yã́i.

5 Ḿmɛ ń ma kía ũ ma Lua,

ni to Yakↄbu buiↄ zĩble.

6 Ń n báaao wi ↄpɛ wá ibɛɛↄwa,

ń n tↄ́o wi ↄ̃zↄ̃ wá wɛ̀lɛpiↄwa.

7 I kɛ ma sá málɛ a náaikɛo,

i kɛ ma fɛ̃nda mɛ́ ì ma bↄo.

8 Asa ḿmɛ ni wá sí wá ibɛɛↄwa,

ni wida wá zangudeↄwa.

9 Lua, wiↄ n táasilɛ gↄↄpii,

wiↄ n tↄbↄ láasai.

10 Ń beeo n ↄpɛ̀wá ń tò wí wá kṹ,

nili bↄ ń wá zĩgↄ̃ↄ lↄo.

11 Ń tò wa pↄ̀ↄbↄzãkɛ̀ wá ibɛɛↄnɛ,

ń tò wá zangudepiↄ wá pↄ́ↄ nàaa.

12 N ń gbá zɛ́ aa wá dɛdɛ lán sãↄwa,

n wá fãaa buipãleↄ guu.

13 N n gbɛ̃́ↄ yìa àa'aa,

ni ài'e ń yíaa yã́ musuo.

14 Ń tò wá saɛdeↄ wá sↄ̃sↄ̃,

gbɛ̃́ pↄ́ liaawáziↄ wá láanikɛ̀.

15 Ń tò wa gↄ̃ yãa ũ buipãleↄnɛ,

gbɛ̃́ↄ ìↄ midɛwɛ̃ɛ.

16 Miↄ kú ń wío gↄↄpiiɛ,

ma gɛɛ gↄ̃̀ kpa ma wɛ́i,

17 ma láanikɛnaↄ ń ma sↄ̃̀sↄ̃naↄ yã́i

ń ma ibɛɛ pↄ́ aa ye tↄsiaↄ yã́o.

18 Bee wá lé píi,

baa kɛ́ n yã́ i sã́wáguo,

mɛ́ wi ń bàakuawanↄ yã́ gbooo.

19 Wá nↄ̀sɛ i liaamao,

wi kɛ̃ n zɛ́wao.

20 N wá wiwi n wá ká gu gbɛ̃gbondeu,

n gusia zↄ̃ↄ kũ̀aawá.

21 Tó wá Lua tↄ́ sã̀wágu,

ge tó wa wɛdↄ̀ dii zĩ̀lozi yãaɛ,

22 Lua a gí eie?

Asa ↄ̃mɛ wá nↄ̀sɛ yã́ dↄ̃ píi.

23 N yã́i wá kú ga lɛ́zĩ gↄↄpii,

wì wá dilɛ lán sã pↄ́ wa ń kòlokpaↄwa.*

24 Vu, Dii! Àkɛa ńlɛ i'oi?

Fɛlɛ! Ńsu wá vũaa gↄↄpiio.

25 Àkɛa n mikpɛlìwɛ̃ɛi?

Wá wɛ̃nakɛa ń wá wɛtãao sã̀ngu yã̀?

26 Wa gↄ̃ ye bùsutiu,

wa gↄ̃ wúlɛa tↄↄlɛ.

27 Fɛlɛ dↄwálɛ!

Mↄ ǹ wá misi n gbɛ̃kɛ yã́i.

*44:23 Lom 8.36