Bibeli Luayãtaalá Nauũ 1

NAUŨ

Yã́ pↄ́ kú láɛ bee guuↄ

Láɛ́ bee dↄ̀aa à lɛ́lɛa Asili pↄ́ Isailiↄ lɛ́ falubↄnɛ́ↄ bùsu mɛɛwia Ninivawa yã'ò. Nauũ lápi kɛ̃̀ e Babiloniↄ aaↄ gɛ́ Niniva dúuzↄ̃i e wàↄ gɛ́ Yesu Kilisi ii wɛ̃̀ 612.

Lápi daalɛa (1.2-8) lɛ́ ↄlↄwɛ̃ɛ kɛ́ Lua mɛ́ iko vĩ dṹnia pↄ́piiwa mɛ́ ↄ̃mɛ a yã́kpalɛkɛ ń dṹniao. A gbɛa (1.9-2.3) lá Lua gbãapi a zĩkɛ bùsuↄ yã́ musu Nauũ gↄↄ. Niniva a kaalɛ, Yudaↄ i gↄ̃ ńzĩa vĩ. A gbɛa lↄ (2.4-3.19) Nauũ Niniva gbãa pↄ́ a vĩ midɛa dàu à sìuwɛ̃ɛ, àlɛ pↄnakɛò.

Ãnabipi yã́ pↄ́ àlɛ yá gbãa dɛ Niniva kaalɛa yã́a. Ninivaá mɛɛwia pↄ́ ĩ́andãa kↄ̃̀uɛ. A gbɛ̃́ↄá dàakɛn lalasideↄnɛ. Gbɛ̃́ bee taaↄ kaalɛ píiɛ.

Dii pↄpaa Ninivadeↄzi

1 Niniva* yã́ pↄ́ Ɛlekosi gbɛ̃́ Nauũ è taalan kɛ:

2 Dii nↄ̀sɛ ì fɛlɛ à tↄsimá,

Dii ì tↄsimá, pↄfɛ̃den aà ũ,

Dii ì tↄsi a ibɛɛↄwa,

ìↄ fɛ̃a a wɛ̀lɛↄzi.

3 Dii pↄ lí pa kpaao,

a gbãa vĩ zↄ̃ↄ,

ìli tó tàaede bↄ̀ pão.

Dii ku zàa'ĩana ń zàao guu,

luabɛpuana dɛ aà kɛ̀sɛ luutɛ̃ ũ.

4 Ì ísia lele, gugii i bↄ,

ì to swa píi í ba,

Basana ń Kaamɛlio i gↄ̃ wɛ̃nannↄ,

Libã bùsu sɛdɛ lá bↄlↄↄ i giigaga.

5 Gbɛ̀sĩsĩↄ ì deedee Dii aɛ,

sĩ̀sĩↄ ì yↄ́,

dṹnia ì lualua aà yã́i,

tↄↄlɛ ń pↄ́ pↄ́ kuwàↄ píi.

6 Démɛ a fↄ̃ gí aà kpɛ̃nɛmuuii?

Démɛ a fↄ̃ àↄ zɛa

aà pↄkũma pãsĩ bↄbↄmagↄↄi?

Aà pↄfɛ̃ ì bↄ lán tɛ́waɛ,

gbɛsiↄ i wi aà aɛ.

7 Dii maa,

a dɛ mikpakĩi ũ wɛ́tɛ̃agↄↄ,

gbɛ̃́ pↄ́ nàaàziↄ ↄ̃ a ń yã́ dↄ̃.

8 A a wɛ̀lɛↄ midɛ ń idaaguao,

a a ibɛɛpiↄ ya ń kpá gusiau.

9 Lɛ́ kpele aalɛ kpaaĩ Diizii?

A a midɛ,

aa wɛ́tɛ̃amↄɛ́ gɛ̃n plao.

10 Aa igbɛ̃ aa kã́, aai gↄ̃ ye lɛu,

tɛ́ i kṹmá míↄmiↄ lán sɛ̃̀ giiwa.

11 Niniva gbɛ̃e lɛ́ lɛ́ gia da gbɛ̃́ↄwa,

àlɛ lɛkpaaĩ ń gbɛ̃́ↄ Diizi.

12 Ma Dii ma mɛ̀:

Baa tó an zĩgↄ̃ↄ mↄ̀ ń dasilɛu,

wa ń kwɛ́ɛ, aai sãalɛ.

Baa kɛ́ ma á swãgàga yãa,

má gága lↄo.

13 Má zuu pↄ́ aa dàɛ́ gboo,

má mↄ pↄ́ aa kàwá kɛ̃́kɛ̃.

14 Yã́ pↄ́ ma Dii má ò Niniva yã́ musun kɛ:

N gbɛ̃e a gↄ̃ n tↄ́ aↄ kuwà lↄo.

Má pↄ́ ãaↄ ń pↄ́ kásaa pↄ́ kú n tã́akpɛuↄ wíwi,

mí mia'ɛ yↄ̃nɛ, asa wɛ̃́lɛ gian n ũ.

Nauũ
<
1
>

*1:1 Sof 2.13-15