Bibeli Luayãtaalá Làasoode 7

7

Ɔ̃nↄdaanɛ́

1 Tↄ́ na maa dɛ tulale bɛɛɛdea,*

mɛ́ gagↄↄ maa dɛ igↄↄa.

2 Gɛ̃a ua pↄ́ wàlɛ gɛwiipɛu maa

dɛ gɛ̃a ua pↄ́ wàlɛ dikpɛkɛula,

asa gbɛ̃́pii midɛan we,

mɛ́ a maa gbɛ̃́ pↄ́ kúↄ yã́pi da.

3 Wɛ̃nakɛa maa dɛ yáalↄaa,

oosisia gbɛa nↄ̀sɛ ì wee.

4 Ɔ̃nↄna laai ìↄ ku ua pↄ́ wàlɛ ↄ́ↄlↄuwa.

Sↄũ laai ìↄ ku ua pↄ́ wàlɛ pↄnakɛuwaɛ.

5 Ɔ̃nↄna n lelea yãdaa maa dɛ

swã́sɛa sↄũ n táasilɛaia,

6 asa sↄũↄ yaalↄ dɛ

lán kù tɛ́ pũnaa kĩnauwaɛ.

Beeá pãɛ lↄ.

7 Gbãa mↄa gbɛ̃́ↄnɛ ì to ↄ̃nↄna sↄũkũɛ,

mɛ́ gbagusaɛ ì gbɛ̃́ ↄ̃̀ↄkpaɛ.

8 Yã́ midɛa maa dɛ a fɛlɛaa,

sùuu maa dɛ kàamaia.

9 Ńsu to n pↄ lí pa àao,†

asa sↄũ mɛ́ ìↄ pↄfɛ̃ vĩ.

10 Ńsu yãgbɛa ǹ mɛ

bↄ́yãi yãagↄↄ maa dɛ tiaaio,

asa yãlaa bee taaá ↄ̃nↄyã no.

11 Ɔ̃nↄá pↄmaaɛ lán túbiwa,

a ài vĩ gbɛ̃́ pↄ́ lɛ́ ĩatɛ̃ eↄnɛ píi.

12 Ɔ̃nↄá kpanziɛɛ,

lá ↄ̃a dɛ kpanziɛ ũwa,

mɛ́ dↄ̃a àin kɛ:

Ɔ̃nↄnaↄ ↄ̃nↄ ì ń misi.

13 Làasookɛ Lua yãkɛaↄwa.

Démɛ a fↄ̃ pↄ́ pↄ́ a kɛ̀ kolea pooi?

14 Tó gↄↄ na mↄ̀ma, pↄnakɛò.

Tó gↄↄ vãiɛ sↄ̃, làasookɛ,

Lua mɛ́ kɛ̀ píi, kɛ́ gbɛ̃e su àↄ a zia dↄ̃o yã́i.

15 Ma wɛ̃ni giiɛ bee guu ma yã́ɛ beeↄ è píi.

Ma gbɛ̃maa è à gà a maakɛa guu,

mɛ́ ma gbɛ̃vãi è àlɛ gɛ̃gɛ̃ a yãvãikɛa guu.

16 Ńsu to n maakɛa gɛ̃agɛ̃o,

ńsu to n ↄ̃nↄ gɛ̃agɛ̃o.

Bↄ́yãi ńyↄ̃ yã́yia nzĩawai?

17 N vãi su gɛ̃agɛ̃o,

ńsu ǹyↄ̃ sↄũo.

Bↄ́yãi ńyↄ̃ ga kpóoi?

18 A maa ǹyↄ̃ yã́ mɛ̀n plapiↄ kũaɛ,

ńsu ↄkpaio,

asa gbɛ̃́ pↄ́ Lua vĩa vĩ ì yã́piↄ zɛ́ e píiɛ.

19 Ɔ̃nↄ ì to ↄ̃nↄna gbãa àↄ dɛ

wɛ̃́lɛ gbãade gbɛ̃ↄn kwiↄla.

20 Gbɛ̃maa pↄ́ ìↄ yãmaakɛ

mɛ́ ìli duunakɛo ku dṹniauo.

21 Ńsu swã́sɛ yã́ pↄ́ wàlɛ ozi píio,

kɛ́ tó n zĩkɛna lɛ́ n ká, ńsu mao yã́i.

22 Asa ń dↄ̃ nzĩawa,

kɛ́ mpi sↄ̃ n gbɛ̃́ↄ kà dasi.

23 Ma wɛtɛ̀ yã́ beeↄi ↄ̃nↄ'ↄ̃nↄ píi,

ma mɛ̀ má ↄ̃nↄkũ, ↄ̃ à zã̀kũmanↄ.

24 Ɔ̃nↄ kúkĩi zã̀,

a asii zↄ̃ↄ maamaaɛ,

démɛ a fↄ̃ bↄwài?

25 Ma ↄ̃nↄ ń yã́pii mio tàasikà,

má yↄ̀ɛ kɛ́ mà e dↄ̃,

mí yãvãikɛa dↄ̃ sↄũkɛ ũ,

mí sↄũkɛ dↄ̃ mìsaikɛ ũ.

26 Má è nↄɛ pↄ́ dɛ bai ũ,

aà sↄ̃á mↄmusunaɛ,

mɛ́ aà ↄↄá mↄdaonaɛ,

aà yã́ ì ma pↄ ya dɛ gaa.

Gbɛ̃́ pↄ́ a yã́ kà Luagu ì pili nↄɛpiwa,

ãma nↄɛpi ì duunkɛna kũɛ.

27 Mámɛmaa Làasoode ma mɛ̀:

Yã́ pↄ́ ma bↄwà gwa.

Kɛ́ málɛ yã́ gwa zɛ́zɛ mà e a midↄ̃,

28 gↄↄ pↄ́ málɛ wɛɛlɛ málɛ eo,

ma gↄ̃ɛ bɛɛɛde è mɛ̀ndo gbɛ̃ↄn ↄ̀aa sↄoↄ guu,

ãma baa mɛ̀ndo mi nↄɛ bɛɛɛde e ń guuo.

29 Yã́ pↄ́ ma bↄwàn kɛ:

Lua gbɛ̃nazĩnaↄ kɛ̀ nↄ̀sɛpuadeↄ ũɛ,

ↄ̃ aa pɛ̀lɛpɛlɛ kↄ̃ni zɛ́u.

*7:1 Yaa 22.1

†7:9 Zaa 1.19