Bibeli Luayãtaalá Làasoode 4

Kua ń kↄ̃o

1 Ɔ̃ ma gbãa pↄ́ wàlɛ mↄ gbɛ̃́ↄnɛ dṹniau yã́ gwà lↄ píi. Ma gbɛ̃́ pↄ́ wàlɛ ń wɛtãↄ wɛ́'i è, aa nↄ̀sɛninina vĩo. Aa nↄ̀sɛninina vĩo, asa an wɛtãnapiↄ mɛ́ gbãa vĩ. 2 Ɔ̃ ma mɛ̀, gbɛ̃́ pↄ́ gà yãaↄ Lua sáaukɛ̀ dɛ gbɛ̃́ pↄ́ kúↄla, 3 ãma gbɛ̃́ pↄ́ wi i yãao, i wɛsi vãi pↄ́ wì kɛ dṹniaulɛo sã̀ↄmá ḿpii. 4 Má è pↄ́ pↄ́ tò gbɛ̃́ ì zĩkɛ à mɛkpawà, kɛ́ à e àↄ dɛ a gbɛ̃́deela yã́iɛ. Beeá pãɛ lↄ mɛ́ gugiiyaaɛ.

5 Sↄũ ì a ↄ kpaaũ à ibaba.

6 Kua ń pↄ́ ↄkũ doo ń sↄ̃daadoũo

maa dɛ kua ń pↄ́ ↄkũ plao

ń isimagakpaao ń gugiiyaaola.

7 Ɔ̃ ma ɛa yãpã pãle è dṹnia guu lↄ. 8 Zĩ̀loe ku, a nɛ́ vĩo, a vĩ̀i ge dãuna vĩo. Aà isima lí bao, kási aà àizɛɛ lí mↄ́wào. Dé yã́i àlɛ zĩkɛii? Bↄ́yãi à pↄnakɛa tɛ̃̀ azĩaɛi? Beeá pãɛ lↄ, bↄↄlɛ pãsĩɛ.

9 Plaa dɛ doũa,

asa an taasi ài aↄ maa.

10 Tó gbɛ̃do lɛ̀lɛ, aà gbɛ̃do a aà sɛ́.

Waiyoo gbɛ̃doũna!

Tó à lɛ̀lɛ, aↄ sɛna vĩo.

11 Tó gbɛ̃ↄn plaↄ wúlɛa gudoũ,

aa kↄ̃ pusu ma.

Kpelewa gbɛ̃doũna a bↄ ĩ́ana yã́ui?

12 Wì gbãamↄ gbɛ̃doũnaɛɛ,

gbɛ̃ↄn plaↄ sↄ̃ aaì zɛ wà giɛ.

Bà nian àaↄ̃ lí kɛ̃́ kpaao.

13 Ɛ̀waaso ↄ̃nↄna taaside maa dɛ kía zi sↄũ pↄ́ lí lɛdama ma lↄola, 14 baa tó ɛ̀waasopi bↄ̀ dakpɛunakɛ guu ↄ̃ à gↄ̃̀ kía ũ, ge wà aà ì bùsupiu táaa ũn lò. 15 Má è dṹnia a tɛ kí gɛ̃ɛ ɛ̀waasopizi, 16 gↄↄ bee aà gbɛ̃́ↄ aaↄ lɛ́ vĩo, gbɛ̃́ pↄ́ a dɛ ń dↄaana ũↄ. Ń beeo gbɛ̃́ pↄ́ aa mↄ gbɛzãↄ aa aà sáaukpao. Beeá pãɛ lↄ mɛ́ gugiiyaaɛ.

Vĩakɛa Luaɛ

17 Tó n gɛ Lua kpɛ́u, ǹyↄ̃ kú ń laaio. Sↄ̃aaàzi ǹ aà yãma maa dɛ sↄũↄ sa'oa wea, asa an yãdↄ̃sai mɛ́ ì to aa yãvãikɛ.