5
Pape ituwymby Jesus nhemakehobyry
1 Aituo keankâ Deus emaym aho eynynâ pape ituwymby kâendyly. Ioday, ikaynâ alelâ keankâ mârâ pape iwenibyem awyly. Sete lelâ keankâ sakâjiho. 2 Târâ anju domodo ewy sedâ lâpylâ. Ago kehoem keankâ mâkâ aguely:
— Ânguyka ise awârâ sakâjihobyry etyim, nhawynkeim warâ? — kely.
3 Deus nhygataymby modo ewy mârâ sakâjihobyry etyim peba olâ keankâ, pape tintain-hoem, anju târâ kaynâ, kurâ tarâ onwâgâ, onro iano modo alelâ. 4 Awylygue keankâ toenzepa ytynru, wogunru warâ, ânguy aguehoymby peba awylygue, pape intuwynguehoem, intain-hoem warâ. 5 Aituo keankâ akaemo agaityom tynrenseim modo ewy yam aguely:
— Tuogunrepa ikâ. Egâ mâkâ, Judá domodo ewy, pymâ Davi iwerypyry leão ara ton-honreim mâkâ. Deus iduery eon-honru idânârâ sainwâm mâkâ. Mâkâ lelâ ise pape sakâjihobyry etyim, ituwyngueim, itainrim warâ — kely keankâ.
6 “Kordeiru” kelygue tâzekeim XYDYK warâ sedâ. Sodo wâgâ xyâhobyry xypyhobyrybe keankâ; igueypyemba olâ keankâ mâkâ iwerâ. Sete lelâ keankâ iwâenky, enu warâ. Mârâ sete tâzenu, Deus sete ispíritu onro anakâ ingonotyby modo mârâ nhenehonly. Deus xurery enado mâkâ âepanâguely. Vinte e quatro agaityom tynrenseim modo, quatro ânguydo imeom warâ mâkâ enâminibyenmo keankâ. 7 Aituo keankâ mâkâ Kordeiru, Pymâ Deus xurery opaji saindyly. Mure wâgâ ekadyby tâmary ahogue pape ituwymby mâkânra nhuduly, Kordeiru kelygue tâzekein-am.
8 Akaemo quatro ânguydo imeom, akaemo vinte e quatro agaityom tynrenseim modo warâ keankâ Kordeiru enado âzeguhoam idylymo. Vinte e quatro agaityom modo harpague tâmatunemo lelâ keankâ. Kudupi ourugue xygatyby edunu tyânrângueingue tumykeimbemo keankâ warâ. Kurâdo Deus agâ aguelylâ mârâ edunu tyânrângueim nhenehonly. 9 Akaemo âzeguhoam ityby modo igâky keankâ mâkâ Kordeiruram. Tâjigâky iwelogue igâtudylymo:
— Âmâ lelâ pape sakâjihobyry sakâjigueim, ituwymby ituwyngueim warâ kehobyry.
Âmâlâma kruz wâgâ igueypy, âunu iapânibyry warâ.
Idânârâ kehoem kurâdo onro anano modo Deus eynynonroem mânhetoem myakâwâm âiguely.
10 Âynynonroem akaemo. Âmâ iwymârymo warâ.
Âmâ ani imaryem ienimo, eynynâ kydato Deus aitobyry nhegatuhomoem.
Agâ ise târâ onro anaym pymâem awylymo
— kely igâkymo.
11 MYK witondyly keankâ. Anju domodo kâendyly. Toenzepamo keankâ tapâguely ekimo kehoem. Tâpagunemo keankâ Deus xurery imâsedo, quatro ânguydo imeom, vinte e quatro agaityom tynrenseim modo warâ tânâmizemo kehoem. Igâkymo xidadâ. 12 Ago kehoem keankâ aguelymo:
— Kordeiru âmâ.
Saguhoem kordeiru tâdyoze kâinane, inakanhe tadawyly xygakehoem;
arâ lâpylâ akâwâm âiguely, inakanhe tâjito xygakeze.
Pymâ ton-honreim âmâ.
Idânârâ tâlânro modo sodo âmâ.
Idânârâ tutuze âmâ. Âdylâ aiese ton-honre âmâ
Tynrenseim âmâ. Koendonro lelâlâ âmâ
Aunlolâ koendâ mawyly wâgâ xina aguely.
Alâ idânârâ âwâgâ anyguemo
— kelymo keankâ.
13 Ilâpygueduo kaynonro modo, onro anano modo, ondano modo, paikano modo warâ igâkymo kâindadyly. Warâ keankâ aguelymo tygâkymoem:
— Koendâ mawyly wâgâ xina aguely.
Pymâ Deus wâgâ, Kordeiru wâgâ warâ xina aguely.
Tynrenseim, koendonro warâ âmaemo!
Iwâkuru, ton-honreim warâ âmaemo.
Âdylâ aiese ton-honre âmaemo.
Aunloenlâ ise arâ mawylymo. Arâpa mitaymba ise âmaemo
— kely keankâ igâkymo.
14 Alâ pylâ keankâ akaemo quatro ânguydo imeom aguely:
— Âwâgâmo aguehomobyry ara lelâlâ âmaemo! — kelymo keankâ.
Akaemo vinte e quatro agaityom tynrenseim modo âzeguhoam idylymo keankâ.
— Koendonro lelâlâ âmaemo! — kelymo keankâ Deusram, Kordeiruram warâ.