1 Kɔ Yakuba eyekti kəro k'ɛnəŋk Esay pəc-der pəsɔlɛ afum 100. Kɔ Yakuba eyer awut Leya, Rasɛl, kɔ acar aŋɛ mɛrəŋ dacɔ. 2 Kɔ Yakuba ɛŋcəmbər aran ɔn acar kiriŋ, k'awut aŋan ŋaŋcɔŋc ŋa, kɔ Leya ɛŋcɛk k'awut ɔn ŋayi kɔ darəŋ, kɔ Rasɛl ɛŋcəmɛ kɔ wan kɔn Isifu eyi kɔ darəŋ. 3 Kɔ nkɔn yati eŋcepər ŋa fɔr kiriŋ, k'ontontnɛnɛ Esay dəntɔf camət-mɛrəŋ, haŋ k'ɔlɔtərnɛ kɔ. 4 Kɔ Esay ɛyɛksɛ kəkɔ-bəpɛnɛ kɔ Yakuba wɛŋc, k'ɛsapnɛ kɔ, k'ɛnɛpsərnɛ kɔ dəkilim, k'oŋcup kɔ, kɔ ŋayɛfɛ fəp faŋan kəbok. 5 Kɔ Esay eyekti kəro, k'ɛnəŋk aran kɔ awut, k'eyif: «Are ŋɔ akaŋɛ?» Kɔ Yakuba oloku kɔ: «Awut akaŋɛ ŋɔ Kanu kənamar im kəsɔtɔ nɔnɔfɔr dɔn disrɛ, ina wəcar kam.» 6 Kɔ aran ɔn acar ŋalɔtərnɛ Esay, kɔ awut aŋan, kɔ ŋantontnɛnɛ kɔ. 7 Kɔ Leya ɔlɔtərnɛ kɔ sɔ kɔ awut ɔn, kɔ ŋa sɔ ŋantontnɛnɛ kɔ, kɔ Isifu kɔ Rasɛl ŋalɔtərnɛ kɔ kɔ ŋantontnɛnɛ kɔ. 8 Kɔ Esay eyif kɔ: «Ake məndeyɔnɛ yɔcɔl yayɛ səŋcepər-cepər mɔ?» Kɔ Yakuba oloku kɔ: «Kətəŋnɛ kam k'inafaŋ. Ti tɔ inacɛm-cɛmnɛ kəsɔŋ əm yi.» 9 Kɔ Esay oloku Yakuba: «Yɛlar im ina wɛŋc im, məmɛŋkərnɛ yayɛ yɔyɔnɛ yam.» 10 Kɔ Yakuba oloku Esay: «Ala. Ilɛtsɛn' am, kɔ pəyɔnɛ fɔ isɔtər əm kətəŋnɛ, məwosɛ məbaŋ kəpocɛ kem. Ti t' imɔmənɛ kəro kam pəmɔ tɔkɔ aŋmɔmən kəro ka Kanu mɔ, kɔ məselɛn' em bel-bel. 11 Məbaŋ kəpocɛ kem nkɛ isɔŋ əm mɔ, bawo Kanu kəmar im k'isɔtɔ daka dɔkɔ ifaŋ mɔ fəp.» Kɔ Yakuba ɛŋcəmɛnɛ ti Esay darəŋ haŋ kɔ wəkakɔ owosɛ kəbaŋ ka kəpocɛ kaŋkɔ. 12 Kɔ Esay oloku: «Paŋkɔn, pasolnɛ dɔpɔ, in' endey' əm kiriŋ.» 13 Kɔ Yakuba oloku: «Wəbɛ kem, məŋcərɛ a awut ŋaŋcuca kəkɔtɛnɛ, k'isolɛ sɔ mir mowut kɔ mana mɛmɛsɛ. K'ayɔ yi yɔkɔt pəpɔŋ dɔsɔk din-ɛ yɔcɔl yowut fəp yeŋfi. 14 Wəbɛ kem məy' im kiriŋ, indey' əm tadarəŋ, pəpic-pəpic isurɛnɛ yɔcɔl k'awut pɔkɔt, haŋ ibɛrɛ ndena wɛŋc im nde atɔf ŋa Sehir.» 15 Kɔ Esay oloku: «Isakər' am afum em alɔma akɔ isolɛ mɔ.» Kɔ Yakuba eyif Esay: «Ak' indeyɔnɛ ŋa-ɛ? Tɛfaŋ ta ina, isɔtɔ kəŋaŋnɛ nnɔ məyi mɔ.» 16 Dɔsɔk dadɔkɔ dɔ Esay ɛlɛk dɔpɔ kəlukus ka Sehir.

17 Kɔ Yakuba ɔŋkɔ dare da Sukɔt. K'ɔlɔ kəlɔ kɔn k'ɔlɔnɛ yɔcɔl yɔn ŋgbaŋcan. Ti t' asɔŋɛ tofo tatɔkɔ tewe ta «Sukɔt* H. «ŋgbaŋcan» ». 18 Kɔ Yakuba ɛmbɛrɛ kətamnɛ disrɛ dare da Səkɛm, atɔf ŋa Kanahan. K'ɔŋkɔ pəcəmbərəs dare kəsək kəbɛrɛ kɔn kəyɛfɛ ka Padaŋ-Aram. 19 K'ɛway awut a Hamɔr arkun dəwaca, papa ka Səkɛm, tofokəl ta antɔf nde ɛnacəmbər abal mɔ. Ɛnaway di mɛŋcəmbəl† H. «kesita» = kəway ka teŋkesiya kənayi tɛm tatɔkɔ 100. 20 Kɔ Yakuba ɛŋcəmbər di dəkəloŋnɛ da Kanu, k'ewe tofo tatɔkɔ «El-Elohe-Yisrayel‡ «El, Kanu ka Yisrayel» ».