1 Kəloŋkanɛ ka alaŋ Yesy aŋɛ ŋanayi dare da Antiyɔk mɔ, sayibɛ-e kɔ atəksɛ ŋanayi ŋa dacɔ: Barnabas, Simɔŋ nwɛ aŋc-deŋər tewe ta «Wəbi» mɔ, Lusiyus wəka Sirɛn, Manahɛŋ nwɛ anadusum kəfo kin kɔ Herodu wəbɛ wəka topoc tin k’ayer atɔf kəmaŋkəlɛ-ɛ, kɔ Sol. 2 Dɔsɔk dɔlɔma, ntɛ alaŋ akakɔ ŋaŋc-kor-koru Kanu mɔ, ŋac-suŋ, kɔ Amera Ŋecempi ŋa Kanu ŋoloku: «Nəcəmbər em kəsək Barnabas kɔ Sol, teta yɛbəc yɔkɔ inawenɛ ŋa mɔ.» 3 Ntɛ alaŋ ŋalip kəsuŋ kɔ kətola Kanu mɔ, kɔ ŋandeŋər Barnabas kɔ Sol waca, kɔ ŋasom ŋa.

4 Ntɛ Amera Ŋecempi ŋa Kanu ŋosom Barnabas kɔ Sol mɔ, kɔ ŋantor atɔf ŋa Selusi, dəndo ŋanalɛk abil kɔ ŋaŋcali kəkɔ ka mokuru ma Sipər. 5 Ntɛ ŋambɛrɛ Salamin mɔ, kɔ ŋaŋcop kəluksɛ toloku ta Kanu nde kəlɔ ka dəkətola Kanu da aSuyif. Saŋ ɛnayi di pəc-mar ŋa.

6 Ntɛ ŋaŋcali mokuru haŋ dare da Pafɔs mɔ, kɔ ŋambəp di fum wəwɛŋkɛ wəlɔma pəc-wenɛ sayibɛ, mba ta ɔyɔnɛ si-ɛ. WəSuyif ɛnayi, pac-we kɔ Bar-Yesu. 7 Wəwɛŋkɛ wəkakɔ ndena Serkus Polu ɛnayi, nwɛ ɛnayɔnɛ wəkiriŋ wəka sədare sa atɔf ŋaŋɔkɔ mɔ. Nkɔn Serkus Polu wərkun wəcempi domp ɛnayi. K’ender k’ewe Barnabas kɔ Sol pəc-tɛn kənenɛ ŋa toloku ta Kanu. 8 Elimas, itɔ tatɔkɔ «wəwɛŋkɛ» kusu kəŋan, ɛŋc-gbɛkəl moloku ma Barnabas kɔ Sol, pəc-tɛn kəkafəli kəlaŋ ka wəkiriŋ Serkus Polu. 9 Mba Sol, nwɛ aŋc-we sɔ Pol mɔ, Amera Ŋecempi ŋeyi kɔ darəŋ, k’ɛŋgbətnɛ Elimas. 10 Kɔ Sol oloku kɔ: «Məna wəkakɔ məla mowul kɔ yem mɔ, wəka amera ŋɛlɛc, wəter pəlompu fəp, məfɔsak kəkafəli-kafəli səpɔ sa Wəbɛ Kanu nsɛ səlomp mɔ ba? 11 Ndɛkəl kəca ka Wəbɛ kəy’ əm kəroŋ: Wətɔnəŋk məndeyɔnɛ! Tɛm tendebəp, məndeyi ta mənəŋk pəwaŋkəra pa dec-ɛ.»

Gbəŋcana babɔkɔ kɔ fɔr yɔyɔ kɔ pafulu kɔ kubump kəwɛkərnɛ kɔ. K’ɛyɛfɛ kənana-nana pəc-tɛn kəca nkɛ kəŋkɔsumpər kɔ kəsolɛ mɔ. 12 Ntɛ wəkiriŋ ka dɔtɔf ɛnəŋk ntɛ tɛnacepər mɔ, k’ɔyɔnɛ wəlaŋ. Mɛtəksɛ mmɛ ɛnanenɛ Barnabas kɔ Sol teta Wəbɛ mɔ mɛnabɔt kɔ dɛbəkəc.

13 Ntɛ Pol kɔ asol ɔn ŋayɛfɛ dare da Pafɔs mɔ, kɔ ŋayekti abɛla kəkɔ ka Perke, nde atɔf ŋa Paŋfili. Kɔ Saŋ Mark ɛŋgbɛy ŋa, k’olukus Yerusalɛm. 14 Kɔ ŋayɛfɛ Perke ŋacəmɛ dɔpɔ daŋan darəŋ haŋ Antiyɔk, atɔf ŋa Pisidi. Kɔ ŋaŋkɔ kəlɔ ka dəkətola da Kanu da aSuyif dɔsɔk da kəŋesəm, kɔ ŋandɛ. 15 Ntɛ alip kəkaraŋ Tawurɛta Musa kɔ Sayibɛ-e mɔ, kɔ abɛ a kəlɔ ka dəkətola da Kanu ndɛ ŋaloku Barnabas kɔ Pol: «Awɛŋc su aŋa, kɔ nəyɔ toloku tecəpəsɛ abəkəc ntɛ nəŋfaŋ kəloku afum mɔ, nəloku ti.»

16 Kɔ Pol ɛyɛfɛ, k’ondot kəca, k’oloku: «Arkun a Yisrayel, kɔ nəna aləpəs aŋɛ nəŋnesɛ Kanu mɔ, nəcəŋkəl! 17 Kanu ka afum akaŋɛ, Kanu ka Yisrayel, kənayɛk-yɛk atem asu, kɔ kəsɔŋɛ ŋa kəla tɛm ntɛ ŋanayi decikəra Misira mɔ, kɔ Kanu kin kaŋkɔ kəwurɛnɛ ŋa atɔf ŋaŋɔkɔ fənɔntər fa kəca kɔn. 18 Kɔ kəlɛkɛ ŋa mes mɛlɛc maŋan nde dətɛgbɛrɛ meren wəco maŋkəlɛ (40). 19 Ntɛ Kanu kənim afum a cusuŋka camət-mɛrəŋ nde atɔf ŋa Kanahan mɔ, kɔ kəsɔŋ atɔf ŋaŋɔkɔ afum ɔn ntɛ tɔŋsɔŋɛ ŋɔyɔnɛ ŋa kɛ mɔ. 20 Mes mamɔkɔ fəp mɛnawon meren masar maŋkəlɛ kɔ wəco kəcamət (450).

Ntɛ tatɔkɔ teŋcepər mɔ, kɔ Kanu kəsɔŋ ŋa aboc kiti, aŋɛ ŋanatɔmpər dɛbɛ da aka Yisrayel mɔ haŋ kəbəp ka tɛm ta aŋnabi Samiyɛl. 21 Kɔ tɛyɛfɛ dənda kɔ aka Yisrayel ŋawer Kanu wəbɛ. Kɔ kəsɔŋ ŋa Sawul wan ka Kis pəyɔnɛ ŋa wəbɛ meren wəco maŋkəlɛ (40). Fum wəka kusuŋka ka Beŋyamin ɛnayi. 22 Ntɛ Kanu kəfən Sawul mɔ, kɔ kəsɔŋ ŋa wəbɛ Dawuda, nwɛ Kanu kənalokɛ ntɛ mɔ: ‹Inəŋk Dawuda wan ka Yisay, fum ɔfɔ nwɛ səwurɛnɛ bəkəc mɔ, iŋcɛm-cɛmnɛ a endeyɔ mɛfaŋ mem fəp.›* I Sam. 15:23

23 Kəbənda ka dokombəra da nkɔn Dawuda, difɔ Kanu kənasɔŋ kəkom ka Yesu Krist kədeyɔnɛ ka nwɛ endeyac afum a Yisrayel, pəmɔ ntɛ kənasɔŋ ti atem asu temer mɔ. 24 Ta Yesu ɛntader-ɛ, Saŋ ɛnacam kəgbət dəromun, ntɛ tɔŋsɔŋɛ afum a Yisrayel fəp ŋasəkpər bəkəc yaŋan yɛtɛfərnɛ Kanu mɔ. 25 Ntɛ Saŋ ɛŋc-ləpəs yɛbəc nyɛ Kanu kənasom kɔ mɔ, eŋc-yif: ‹Pɛcɛm-cɛmnɛ ponu, an’ iyɔnɛ-ɛ? Nwɛ nəŋcɛm-cɛmnɛ a nkɔn iyɔnɛ mɔ, bafɔ nkɔn iyɔnɛ de! Mba endeder tadarəŋ tem nwɛ pəntɔmar’ im yati kəsikəlɛ cɔfta dəwɛcək mɔ.›

26 Awɛŋc im aŋa, nəna awut aka dokom da Abraham, kɔ nəna akɔ nəŋnesɛ Kanu mɔ, səna ŋɔ anakɛrɛ toloku ntɛ tendeyac su mɔ. 27 Mba aka Yerusalɛm kɔ abɛ aŋan ŋanacərɛ fɛ fum nwɛ Yesu ɛnayɔnɛ mɔ. Ŋanagbɛkərɛ fɛ sɔ moloku ma sayibɛ-e mmɛ aŋc-karaŋ dɔsɔk o dɔsɔk da kəŋesəm mɔ, mba ŋanader ŋalas moloku mamɔkɔ ntɛ ŋanabocər Yesu kiti mɔ. 28 Ŋanasɔtɔ fɛ ntɛ o ntɛ tɔkɔ pənamar a ŋadifɛ Yesu mɔ, mba ŋantola Pilat kədif kɔn. 29 Ntɛ ŋalip kəyɔ mes fəp mɔkɔ anacic tetɔn mɔ, kɔ ŋantorɛ kɔ dəkətɔk kəpəmpəl, kɔ ŋaŋkɔ ŋaboc kɔ dəkufu. 30 Mba Kanu kənayekti kɔ afum afi dacɔ. 31 Kɔ Yesu owurər mataka mɛlarəm akɔ ŋanapɛ kɔ nkɔn kəyɛfɛ Kalile kəkɔ ka Yerusalɛm mɔ. Ŋa ŋayɔnɛ oŋ aŋɛ ŋanatəŋnɛ kəyɛfɛ ka Yesu afi dacɔ mɔ, ŋa ŋantam sɔ kəluksɛ ti afum alɔma.

32 Kɔ səna toloku tɔtɔt tatɔkɔ tɔ səloku nu: Temer mpɛ anasɔŋ atem asu mɔ, 33 Kanu kəlasɛ su ti bel-bel, səna dokomɛnɛ daŋan, kəyekti ka Yesu, pəmɔ tɔkɔ aŋcic ti Yabura Dawuda ya mɛrəŋ disrɛ mɔ:

36 Dawuda nkɔn ɛnabəc tɛfaŋ ta Kanu dɛtɛmp dɔn disrɛ, k’ɛfəntərɛ k’efi, k’awup kɔ nde atem ɔn kəsək, k’ente dəkufu. 37 Mba fum nwɛ Kanu kənatimi afi dacɔ mɔ, nkɔn ɛnate fɛ.

38 Awɛŋc im aŋa, nəcərɛ ti: Teta nkɔn Yesu t’ aŋcamɛ nu kəŋaŋnɛnɛ ka kiciya, kiciya nkɛ sariyɛ sa Musa sənatɔ-tam kəsɔkəs nu mɔ. 39 Ti disrɛ, nwɛ o nwɛ omboc kəlaŋ kɔn nnɔ Yesu eyi mɔ, Kanu kəndesɔkəs kɔ. 40 Nəkɛmbərnɛ ntɛ tɔŋsɔŋɛ mes mɔkɔ sayibɛ-e ŋaŋcic mɔ ta mɛbəp nu:

42 Dəkəwur daŋan, kɔ afum ŋalɛtsɛnɛ ŋa kəder sɔ dɔsɔk da kəŋesəm dɔkɔ dender mɔ kədegbɔkərɛ moloku min mayi. 43 Ntɛ kənay kəsakətɛnɛ mɔ, aSuyif alarəm kɔ akɔ ŋambɛrɛ dinɛ d’ aSuyif mɔ ŋaŋcɛpsɛ Pol kɔ Barnabas kəlok-loku kəŋan disrɛ. Kɔ akakɔ ŋasɛp kəcəpəs ŋa bəkəc teta kəsumpər kəmar ka Kanu.

44 Dɔsɔk da kəŋesəm ndɛ dɛnacɔŋc mɔ, kɔ aka dare fəp ŋaloŋkanɛ kəkɔ-cəŋkəl toloku ta Wəbɛ. 45 Ntɛ aSuyif ŋananəŋk kənay ka afum mɔ, kɔ ŋayɔ kəraca kəpɔŋ. Kɔ ŋayɛfɛ kəgbɛkəl Pol, ŋac-lɔməs kɔ.

46 Pol kɔ Barnabas ŋambaŋsɛ kəloku ŋa: «Nəna yati pənamar a pacop kəluksɛ toloku ta Kanu. Mba ntɛ nənabupərɛ ti, kɔ nəncɛm-cɛmnɛ a pəmar fɛ a nəsɔtɔ kəyi wəyeŋ ka doru o doru mɔ, ndɛkəl oŋ səna səndekafəlɛ səkɔ ndena akɔ ŋantɔyɔnɛ aSuyif mɔ. 47 Bawo Wəbɛ osom su ntɛ:

48 Ntɛ afum ŋane ti mɔ, kɔ pəmbɔt atɔyɔnɛ Suyif dəbəkəc. Kɔ ŋaŋkor-koru toloku ta Wəbɛ, aŋɛ Kanu kənacəmbərɛ kəyi wəyeŋ ka doru o doru mɔ, kɔ ŋayɔnɛ alaŋ.

49 Kɔ toloku ta Wəbɛ tɛsaməsər dɔtɔf fəp. 50 Mba kɔ aSuyif alɔma ŋaŋgbiŋər aran abeki akor-koru Kanu, kɔ abeki a dare, kɔ ŋaŋcop kətɔrəs Pol kɔ Barnabas teta kəlaŋ kəŋan kɔ ŋambɛləs ŋa dare daŋan. 51 Pol kɔ Barnabas ŋaŋkoŋər ŋa kəbof ka wɛcək waŋan, kɔ tɔyɔnɛ sede sa kəfati kəŋan kəcəŋkəl toloku ta Kanu, kɔ ŋaŋkɔ Ikoniyon. ‡ «Kɔ akakɔ ŋaŋkoŋər ŋa kəbof ka wɛcək waŋan,» pəmɔ tɔkɔ Wəbɛ Yesu ɛnaloku ti acɛpsɛ ɔn darəŋ mɔ: a dare o dare dɔkɔ ŋaŋkɔ a tawosɛ kəcəŋkəl toloku ta Kanu mɔ, a ŋakoŋər dare dadɔkɔ kəbof ka wɛcək waŋan. Ti t’ eŋmentər a ŋanacepər dare dadɔkɔ akɔ antɔwosɛ kəcəŋkəl toloku ta Kanu. 52 Pəmbɔt acɛpsɛ a Yesu darəŋ, kɔ Amera Ŋecempi ŋa Kanu ŋɛnayi kɔ ŋa.