1 Nɑ kɑ nɛn nɔni ɑrukɑwɑni bɔkuɑ nɑ nɛɛ,

nɑ ǹ kɑ yi wɔndiɑ mɛɛrimɔ pɑi.

2 Ǹ n mɛn nɑ, ɑre yirɑ̀ Gusunɔ Dɑm kpuroɡii u mɑn yiiye wɔllɔ.

3 Tɔn kɔ̃sowɑ u rɑ kɑm ko,

kpɑ durumɡii u nɔni sɔ̃ɔrɑ.

4 Gusunɔ u nɛn swɑɑ yɛ̃.

U nɛn sɑnu sɑnusu mɛɛrimɔ.

5-6 Gusunɔ u mɑn yĩruo kɑ kilo ye yɑ sɑ̃ɑ dee dee.

Kpɑ u wɑ mɑ nɑ dɛɛre,

nɑ ǹ wɑ̃ɑ weesu kɑ tɑki sɔɔ.

7 Nɛn sɑnu sɑnusu sù kun sɑ̃ɑ dee dee,

ǹ kun mɛ nɛn ɡɔ̃ru ɡɑ̀ n kɔ̃sɑ binɛ kuɑ ye nɛn nɔni yi wɑ,

ǹ kun mɛ durum ɡɑɑ yɑ̀ n mɑn wɑ̃ɑsi,

8 Gusunɔ u de ye nɑ duurɑ, ɡoo u ye tubi di u ɡɛ̃,

kpɑ nɛn dɑ̃ɑ ɡbɑɑru tu kɑm ko.

9 Nɑ̀ n mɑɑ kurɔ ɡoo binɛ kuɑ,

ǹ kun mɛ nɑ̀ n nùn yinɑ bɛriɑ win dii kɔnnɔwɔ,

10 Gusunɔ u de nɛn kurɔ u durɔ ɡoo doo kuɑ,

kpɑ ɡɑbu bu kɑ nùn kpunɑ.

11-12 Nɑ̀ n kɔ̃sɑ yen bweseru kuɑ

yɑ koo mɑn kɑm koosiɑ kɑ nɛn ɑrumɑni sɑnnu nɡe dɔ̃ɔ.

Domi n weenɛ siri kowo u yen bweseru sɛɛyɑsiɑ.

13 Nɑ̀ n yinɑ n nɛn sɔm kowobu ben kɔsiɑru wɛ̃,

14 mbɑ kon kpĩ n ɡere Gusunɔn wuswɑɑɔ.

Nɡe mbɑ kon nùn sɔ̃ ù n mɑn sɛɛyɑsiɑmɔ.

15 Gusunɔ wi u mɑn tɑkɑ kuɑ nɛn mɛron nukurɔ,

wiyɑ u mɑɑ bu tɑkɑ kuɑ.

Gusunɔ turo wiyɑ u bɛsɛ kpuro mɔmɑ bɛsɛn bɑɑwuren mɛron nukurɔ.

16 Nɑ ǹ sɑ̃ɑrobu yinɑri ye bɑ mɑn bikiɑ.

Nɑ ǹ mɑɑ ɡɔminibu derire nɔni swɑ̃ɑru sɔɔ.

17 Nɑ ǹ ɡobeku dĩɑnu birɑre nɛn yɛnuɔ.

18 Domi sɑɑ nɛn ɑluwɑɑsirun di,

nɑ rɑ ɡobekubɑ nɔɔriwɑ

nɡe nɛnɑ nɑ ben tundo,

kpɑ nɑ n ɡɔminibu nɛni.

19 Nɑ̀ n wɔnwɔndo ɡoo wɑ u yɑ̃nun bukɑtɑ mɔ,

20 nɑ rɑ nùn yɑ̃nu kɛ̃wɑ ni nɑ kuɑ kɑ nɛn yɑɑ sɑbenun sɑnsu u kɑ wooru yɑri.

21 Nɑ ǹ ɡobeku ɡoo tɑki diire

yèn sɔ̃ nɑ siri kowo ɡoo tɑ̃sɑ.

22 Nɑ̀ n yeni kpuron ɡɑɑ koore,

Gusunɔ u de nɛn senu nu sɔsikiɑrɑ sɑɑ nin ɡbin ɡbinkɑn di,

kpɑ nɛn ɡɑ̃senu nu wɔrumɑ nu bɔɔkirɑ.

23 Domi Gusunɔn sɛɛyɑsiɑbu bu mɑn bɛrum mɔ̀.

Nɑ ǹ mɑɑ kpɛ̃ n yɔ̃rɑ win wuswɑɑɔ win kpɑ̃ɑrun sɔ̃.

24 Nɑ ǹ nɛn nɑɑnɛ dokere wurɑ sɔɔ,

n ɡere n nɛɛ, wurɑ, ɑ sɑ̃ɑwɑ nɛn yĩiyɔbu.

25 Nɑ ǹ mɑɑ tii suɑre nɛn dukiɑn kpɑ̃ɑrun sɔ̃.

26 Nɑ ǹ suru ǹ kun mɛ sɔ̃ɔ sɑ̃ɑre,

yen ɡɑɑ yɑ̀ n yɑrɑ.

27 Nɛn ɡɔ̃ru ɡɑ ǹ wurɑre ben mi ɡiɑ ɑsiri sɔɔ.

Nɑ ǹ mɑɑ nɔmu dokere nɔɔwɔ n kɑ bu bɛɛrɛ wɛ̃.

28 Nɑ̀ n yen ɡɑɑ koore,

n weenɛ siri kowobu bu mɑn sɛɛyɑsiɑ.

Domi nɑ Gusunɔ Dɑm kpuroɡii yinɑwɑ mi.

29 Nɑ ku rɑ nuku dobu ko nɛn yibɛrɛ ù n nɔni sɔ̃ɔre.

Nɑ ku rɑ yɛ̃ɛri wɑhɑlɑ yɑ̀ n nùn deemɑ.

30 Nɑ ǹ mɑm torɑre n win ɡɔɔ kɑnɑ kɑ bɔ̃ri.

31 Nɛn yɛnuɡibu bɑ yɛ̃ mɑ nɑ rɑ sɔbu dɑm koosie,

kpɑ bu di bu debu nɛn yɛnuɔ.

32 Nɑ ku rɑ wure sɔɔ u kpunɑ tɔɔwɔ ù n tunumɑ.

Nɑ rɑ nùn nɛn ɡɑmbobɑ kɛniɛwɑ u du.

33 Nɑ ku rɑ nɛn torɑnu bere nɡe tɔn be bɑ tie.

Nɑ ku rɑ mɑɑ nɛn durum tii mɑrisi.

34 Nɑ ku rɑ n tɔmbun ɡeren bɛrum mɔ.

Nɑ ku rɑ tii ɡɔwe n nɛɛ, bɑ mɑn ɡɛmɑ.

35 Nɛn ɡɑri dɑ̃ɑki wee.

Mɑnɑ kon ɡoo wɑ u mɑn swɑɑ dɑki.

Dɑm kpuroɡii u mɑn wisio.

Nɛn yibɛrɛ ù n dɑɑ nɛn torɑnu yoruɑ tireru sɔɔ,

36 kon tu sɔndiwɑ nɛn senɔ,

kpɑ nɑ n tu doke nɡe sinɑ furɔ.

37 Kon Gusunɔ susiwɑ nɡe sinɑ boko,

kpɑ n nùn sɔ̃ ye nɑ kuɑ kpuro.

38 Nɛn ɡberu tɑ̀ n mɑn wuri koosi,

mɑ ten kpĩi yi nɔni yĩresu yɑrimɔ,

39 ǹ kun mɛ, nɑ̀ n ten dĩɑnu di nɑ ǹ ɡɑ̃ɑnu kɔsie,

mɑ nɑ be bɑ rɑɑ tu mɔ nuki sɑnkɑ,

40 tu sɑ̃ki kɑ yɑkɑ kɔ̃susu kpiiyo dĩɑnun ɑyerɔ.

Yoobun ɡɑrin kpurowɑ mi.