2 mɛyɑ, bɛɛyɑ i tɔmbun yɛ̃ru kpuro mɔ.

Ì n ɡu, bwisi kpɑwɑ mi hɑnduniɑɔ.

3 Adɑmɑ nɛn tii nɑ mɑɑ bwisi mɔwɑ mi nɡe bɛɛ.

I ǹ mɑn bwisi kere.

Wɑrɑ kun yeni kpuro yɛ̃ ye i sɑɑrɑ mi.

4 Bɑɑ mɛ nɑ Gusunɔ kɑnɑ, u mɑn wisɑ,

nɛn kpɑɑsibɑ mɑn yɑɑkoru mɔ̀.

Bɑɑ mɛ nɑ ǹ tɑɑrɛ ɡɑɑ mɔ,

nɛn bɔrɔbɑ bɑ mɑn yɛ̃ɛmɔ.

5 Be bɑ wɑ̃ɑ bɔri yɛndu sɔɔ,

bɑ rɑ n wɔnwɔndobu kɑ be bɑ sɛllɑmɔ ɡɛmɑwɑ.

6 Gbɛnɔbun yɛnu ɡɑ rɑ n wɑ̃ɑ ɑlɑfiɑ sɔɔ.

Be bɑ Gusunɔ seesimɔ, bɑ rɑ n wɑ̃ɑ bɔri yɛndu sɔɔ.

Bɑ rɑ n ben tiin dɑm sɑ̃ɑmɔ.

7 A yɛɛ kɑ ɡunɔsu bikio, su koo nun sɔ̃.

8 A tem bikio, mu koo nun bwisi kɛ̃.

A de swɛ̃ɛ yi nun sɑɑriɑ.

9 Tɑkɑ koorɑ ye kpuro sɔɔ,

yen yerɑ̀ yɑ ǹ yɛ̃ mɑ Yinni Gusunɔwɑ u ye kpuro mɔ̀.

10 Wiyɑ u tɑkɑ koorɑ kpuro

kɑ hunde koni bɑɑyere kpuron wɑ̃ɑru nɛni.

11 Yen sɔ̃nɑ bɑ mɔndu kuɑ bɑ nɛɛ,

soowɑ ɡɑ rɑ ɡɑrin dobu wunɑnɛ,

kpɑ dɑro ɡu mɑɑ dĩɑnun dobu wunɑnɑ.

12 Wi u tɔkɔ kuɑ u rɑ n yɛ̃ru mɔ.

Wi u mɑɑ hunde dɛnyɑ u rɑ n bwisi mɔ.

13 Adɑmɑ Yinni Gusunɔwɑ u bwisi

kɑ lɑɑkɑri kɑ dɑm kpuro mɔ.

14 Ye u sɑnkɑ kpuro, ɡoo kun kpɛ̃ u ye sɔmɛ.

Wi u mɑɑ mwɑ u pirisɔm doke, ɡoo kun kpɛ̃ u yɛ̃ro yɑrɑ.

15 Ù n ɡurɑ yɔ̃rɑsiɑ, kpuro rɑ ɡberewɑ.

Ù n mɑɑ ye yɔ̃su, kpɑ tem mu sɑnkirɑ.

16 Wiyɑ u dɑm kɑ lɑɑkɑri mɔ.

Wiyɑ u mɑɑ tɔnu mɔ wi u torɑ kɑ wi u win winsim torɑsiɑ.

17 U rɑ be bɑ rɑ tem wunɑnɔsu ko mwɛɛri tereru.

Kpɑ u de siri kowobu bu ɡɔsiɑ wiirobu.

18 U rɑ sinɑmbu bɑndu yɑre,

kpɑ u bu ko yobu.

19 U rɑ yɑ̃ku kowobu mwɛɛri tereru,

kpɑ u ben dɑmɡibu suriri.

20 U rɑ bèn nɔɔn ɡɑri bɑ rɑ nɑɑnɛ ko dɛre u kɔ̃,

kpɑ u durɔ tɔkɔnun lɑɑkɑri kpeerɑsiɑ.

21 U rɑ wiruɡibu sekuru doke,

kpɑ u sinɑmbun dɑm buɑ.

22 U rɑ ye yɑ beruɑ yɑm wɔ̃kuru sɔɔ kpuro terɑsie,

kpɑ u de yɑm bururɑm mu sɔ̃ɔsirɑ mi yɑm wɔ̃kurɑ rɑɑ wɑ̃ɑ.

23 Wiyɑ u rɑ bwesenu dɑbiɑsie,

kpɑ u mɑɑ nu kpeerɑsiɑ.

Wiyɑ u rɑ de nu tɛriɑ, kpɑ u mɑɑ nu kɑwɑ.

24 U rɑ bwesenun wiruɡibun bwisi wunɛ,

kpɑ u de bɑ n bɔsu ɡbɑburɔ, mi swɑɑ sɑri.

25 U rɑ de bɑ n bɑbi yɑm wɔ̃kuru sɔɔ,

kpɑ u de bɑ n bɔsu nɡe be tɑm mu ɡoomɔ.