1 ܐܵܗܵܐ ܓܵܗܵܐ ܕܬܠܵܬ ܝܼܠܵܗ̇ ܕܒܹܐܬܵܝܵܐ ܝܘܸܢ ܠܟܸܣܠܵܘܟ݂ܘܿܢ. ܟܠܔ ܚܲܕ ܡܸܢܕܝܼ ܒܸܬ ܦܵܐܹܫ ܡܘܼܣܒܸܬܵ‌ܐ ܒܝܲܕ ܗܹܡܸܙܡܵܢ ܕܬܪܹܝ ܝܲܢ ܬܠܵܬܵ‌ܐ ܣܵܗܕܹ̈ܐ.✡ ܬܢܝܢ ܢܡܘܣܐ 19‏:15 2 ܡ̣ܢ ܩܲܕܡܵܝܬܵ‌ܐ ܐܡܝܼܪܝܼ ܐܸܠܵܘܟ݂ܘܿܢ ܐܝܼܡܲܢ ܕܝܼܘܸܢ ܗܘܵܐ ܠܟܸܣܠܵܘܟ݂ܘܿܢ ܓܵܗܵܐ ܕܬܲܪܬܹܝ، ܘܐܵܕܝܼܵܐ ܒܹܐܡܵܪܵܐ ܝܘܸܢ ܟܲܕ ܐܵܢܵܐ ܪܸܚܩܵܐ ܡܸܢܵܘܟ݂ܘܿܢ، ܕܐܸܢ ܐܵܬܹܝܢ ܡܸܢܕܪܸܫ ܠܹܐ ܚܵܣܟܹܢ ܠܐܵܢܝܼ ܕܚܛܹܐ ܠܗܘܿܢ ܡ̣ܢ ܩܲܕܡܵܝܬܵ‌ܐ ܘܐܘܼܦ ܠܟܠܵܝܗ‌ܝ ܐܚܹܪ̈ܢܹܐ ܡܸܢܵܝܗ‌ܝ، 3 ܣܵܒܵܒ ܒܸܛܠܵܒܵܐ ܝܬܘܿܢ ܣܵܒܸܬܘܼܬܵ‌ܐ ܡܸܢܝܼ ܕܡܫܝܼܚܵܐ ܗܲܡܙܘܼܡܹܐ ܝܠܹܗ ܒܝܼܝܼ، ܗ̇ܘ ܕܠܹܐ ܝܠܹܗ ܙܲܒܘܼܢ ܒܝܼܵܘܟ݂ܘܿܢ ܐܸܠܵܐ ܚܲܝܠܵܢܵܐ ܝܠܹܗ ܓܵܘܵܘܟ݂ܘܿܢ. 4 ܐܘܼܦ ܐܸܢ ܕܦܝܼܫ ܠܹܗ ܙܩܝܼܦܵܐ ܒܙܲܒܘܼܢܘܼܬܵ‌ܐ، ܐܝܼܢܵܐ ܒܸܚܵܝܵܐ ܝܠܹܗ ܒܚܲܝܠܵܐ ܕܐܲܠܵܗܵܐ. ܐܘܼܦ ܐܲܚܢܲܢ ܙܲܒܘܼܢ ܝܼܘܲܚ ܒܝܼܹܗ، ܐܝܼܢܵܐ ܒܸܬ ܚܵܝܲܚ ܥܲܡܹܗ ܒܚܲܝܠܵܐ ܕܐܲܠܵܗܵܐ، ܕܦܵܠܚܲܚ ܐܸܠܵܘܟ݂ܘܿܢ.

5 ܨܲܚܨܹܝܡܘܼܢ ܓܵܢܵܘܟ݂ܘܿܢ ܘܚܙܹܝܡܘܼܢ ܐܸܢ ܒܗܲܝܡܵܢܘܼܬܵ‌ܐ ܝܬܘܿܢ. ܬܲܦ̮ܬܸܫܘܼܢ ܓܵܢܵܘܟ݂ܘܿܢ. ܠܹܐ ܝܬܘܿܢ ܒܝܼܕܵܥܵܐ ܕܝܼܫܘܿܥ ܡܫܝܼܚܵܐ ܓܵܘܵܘܟ݂ܘܿܢ ܝܼܠܹܗ، ܐܸܠܵܐ ܐܸܢ ܢܵܦܠܝܼܬܘܿܢ ܒܨܲܚܨܲܝܬܵܘܟ݂ܘܿܢ؟ 6 ܐܝܼܢܵܐ ܐܝܼܬ ܠܝܼ ܗܹܒ݂ܝܼ ܕܒܸܬ ܝܵܕܥܝܼܬܘܿܢ ܕܠܵܐ ܢܦܝܼܠܔ ܠܲܢ ܒܨܲܚܨܲܝܬܵ‌ܐ. 7 ܨܲܠܘܼܝܹܐ ܝܘܲܚ ܠܐܲܠܵܗܵܐ ܕܠܵܐ ܥܵܒ݂ܕܝܼܬܘܿܢ ܡܸܢܕܝܼ ܚܸܪܒܵܐ، ܠܵܐ ܕܡܲܒܝܸܢܲܚ ܡܘܼܢܬܝܼܹܐ ܒܨܲܚܨܲܝܬܲܢ، ܐܝܼܢܵܐ ܕܥܵܒ݂ܕܝܼܬܘܿܢ ܡܸܢܕܝܼ ܛܵܒ݂ܵܐ، ܐܘܼܦ ܐܸܢ ܕܐܢܵܫܹ̈ܐ ܚܵܫܒ݂ܝܼ ܕܢܦܝܼܠܔ ܠܲܢ، 8 ܣܵܒܵܒ ܠܹܐ ܡܵܨܲܚ ܥܵܒ݂ܕܲܚ ܡܸܢܕܝܼ ܕܲܠܩܘܼܒ݂ܠܔ ܕܫܪܵܪܵܐ ܐܸܠܵܐ ܠܓܹܒܵܐ ܕܫܪܵܪܵܐ. 9 ܒܸܚܕܵܝܵܐ ܝܘܲܚ ܐܝܼܡܲܢ ܕܐܲܚܢܲܢ ܙܲܒܘܼܢ ܝܼܘܲܚ ܐܝܼܢܵܐ ܐܲܚܬܘܿܢ ܚܲܝܠܵܢܹ̈ܐ ܝܬܘܿܢ. ܘܐܘܼܦ ܨܲܠܘܼܝܹܐ ܝܘܲܚ ܕܗܵܘܹܝܬܘܿܢ ܓܡܝܼܪܹ̈ܐ. 10 ܒܘܼܬ ܐܵܗܵܐ ܒܸܟܬܵܒ݂ܵܐ ܝܘܸܢ ܐܲܢܹܐ ܟܲܕ ܐܵܢܵܐ ܪܸܚܩܵܐ، ܕܐܝܼܡܲܢ ܕܐܵܬܹܝܢ ܠܵܐ ܗܵܘܹܝܢ ܩܸܫܝܵܐ ܒܫܘܼܠܛܵܢܝܼ ܥܲܠܵܘܟ݂ܘܿܢ، ܐܲܝܢܝܼ ܕܡܵܪܲܢ ܝܘܼܗܒܹܠܔ ܠܹܗ ܐܸܠܝܼ ܠܒܢܵܝܬܵܘܟ݂ܘܿܢ ܘܠܵܐ ܠܬܠܵܚܬܵܘܟ݂ܘܿܢ.

11 ܒܚܲܪܬܵ‌ܐ ܐܲܚܘܿܢܘܵܬ‌ܝܼ̈، ܚܕܹܝܡܘܼܢ، ܗܘܹܝܡܘܼܢ ܓܡܝܼܪܹ̈ܐ، ܦܘܼܫܘܼܢ ܠܸܒܵܢܹ̈ܐ، ܗܘܹܝܡܘܼܢ ܒܚܲܕ ܪܸܥܝܵܢܵܐ، ܚܹܝܡܘܼܢ ܒܫܠܵܡܵܐ، ܘܐܲܠܵܗܵܐ ܕܚܘܼܒܵܐ ܘܕܫܠܵܡܵܐ ܗܵܘܹܐ ܥܲܡܵܘܟ݂ܘܿܢ. 12 ܕܪܹܝܡܘܼܢ ܫܠܵܡܵܐ ܚܲܕ ܠܗ̇ܘ ܐܚܹܪܢܵܐ ܒܢܫܘܼܩܬܵ‌ܐ ܩܲܕܝܼܫܬܵ‌ܐ. 13 ܒܝܼܵܗܒ݂ܵܐ ܝܢܵܐ ܫܠܵܡܵܐ ܐܸܠܵܘܟ݂ܘܿܢ ܟܠܵܝܗ‌ܝ ܩܲܕܝܼܫܹ̈ܐ. 14 ܫܵܦܵܩܲܬ ܕܡܵܪܲܢ ܝܼܫܘܿܥ ܡܫܝܼܚܵܐ، ܘܚܘܼܒܵܐ ܕܐܲܠܵܗܵܐ، ܘܫܲܪܝܼܟܘܼܬܵ‌ܐ ܕܪܘܼܚܵܐ ܕܩܘܼܕܫܵܐ ܥܲܡ ܟܠܵܘܟ݂ܘܿܢ. ܐܵܡܹܝܢ.