1 Siseri lehe i Elaeja, tau Tisbi lolo vanue Kiliad, mo veve lawe Ehab vena, “Namo haharigi lo henai Huqe, i Huqe Mauri nora tau Israel hi mo mwaso, ngehi neu nam tabana lawea, a endano vin hatie sige a uhe lolo higao ram vumai mosigei teu vin dadari lune i neu nain veve.” 2 Siu a leo noi Huqe mo vomai lawe Elaeja vena, 3 “Goin siregi hano, goin liliu sulo matenaho mo galo me goin hili lolo halai wai Kerit, lo tavalui Jodan suvohi na matenaho mo galo. 4 Goin inuinu dena halai wai matamata, me neu nain hora na manu revin hurive rain bete na hinaga lawe go taie.” 5 Siu mo vai mwerehi i Huqe u vevea lawea. Ngeie mo vano sulo halai wai Kerit, lobei Jodan lune matenaho mo galo. Me mo toga taie. 6 A revin ram wali na hinaga mena gabigigi lolo rombongi me hinaga mena gabigigi lolo revirevi lawea, me mo inuinu dena halai wai matamata. 7 Lo tagugi he rimbi tea a halai matamata hi mo mamaha huri he uhe tea lolo vanue.

8 Siu a leo noi Huqe mo vumai lawea vena, 9 “Go vano siseri Sarevat lolo vanue Sidon me gom toga taie. Neu nau hora na vavine mandue tau lo ute hi ve vin bete na hinaga lawego.” 10 Siu nge mo vano Sarevat. Tavohe nge mo vomai lo mataituregi vanue renge, a vavine mandue mo vile avi. Nge mo ware su vano lawea me mo hui, “?Huri ve gon lai na wai biti lolo laha i nan inue?” 11 Tavohe vavine hi mo vano ve na laie, nge mo ware, “Etue, me goin lei na tavisei bereti te biti lawe au.” 12 Ngeie mo duvi vena, “Namo haharigi lo henai nomuHuqe Mauri mo mwaso, gangu hinaga hatie nge a vulaoa biti u tatarise mena qaqai lime lolo laha me a vureigi biti lolo laha. Neu nam vile bubugi na avi hogosire, ve na laire talo valengu me nai vei na hinaga huri eu mei netungu mwera, huri ve gori genie, siu gorom mate.” 13 Elaeja mo veve lawea move, “Go mese matagu. Go mule me gom vai na havai mwere gu vevea. Nge tomuegi goin vei na hinaga biti huri eu dena gamu hinaga mo eno. Me gom laie su vomai lawe au. Siu gom vai na hinaga huri go mei netumu. 14 Huri lehe havai i Huqe, i Huqe Mauri nora tau Israel u veve: ‘A lahai vulaoa vin he rovo te lai me a lahai vurei vin he mamaha tea, vin dadari lo rani hi a Huqe vin bete na uhe lolo vanue.’ ” 15 Nge mo vano me mo vai na havagi hi i Elaeja u vevea lawea. Siu a hinaga mo eno vataha rani huri Elaeja me huri na vavine hi mei netune. 16 Huri a lahai vulaoa he rovo tea me a lahai vurei he mamaha tea, mo huri na leo noi Huqe i Elaeja u vevea.

17 Lo tagugi he rimbi tea a vavine hi mo leogoro na vale, i netune maresu mwera hi mo sege. Nge mo sege mo asi lawagi, me mo asi vohogi, me a mabuhine mo vano. 18 Nge mo veve lawe Elaeja, “?Tangaloi noi Huqe Mauri, a nomu havagi vohivohi eu? ?Ve gu vomai huri ve goin veve raga na nongu asiana laweau me gom ue vaga mate netungu?” 19 I Elaeja mo duvi, “Go bete netumu laweau.” Nge mo laie dena limana, me mo walie su hage eulu lolo loloi vale hi lune ngeie mo toga, me mo guroe lo qeana. 20 Siu ngeie mo ngara hage lawe na Huqevena, “?O nongu Huqe Mauri, ve gu lei na romasi lawe na mandue ngaha neu nam toga meie, mo vai netune mo mate?” 21 Siu nge mo eno bimbi na maresu mwera hi vaga tolu me mo ngara lawe na Huqe vena, “O nongu Huqe Mauri, go hagavi gamai, go siregi na mwasoana noi maresu mwera ngaha na mule taligu lawea!” 22 A Huqe mo rongo na ngarana noi Elaeja, me a mwasoana noi maresu mwera hi mo mule lawea taligu, me ngeie mo mwaso. 23 Elaeja mo ragasi na maresu hi taulu me mo walie su hivo vuine dena loloi vale hi eulu tau lolo vale vurugegi. Nge mo betea lawe retahine me move, “Gon lehe, i netumu u mwaso!” 24 Siu a vavine hi mo veve lawe Elaeja vena, “Siseri lehe i neu nam ilo huri ve i nigo a tangaloi noi Huqe Mauri me a leo noi Huqe dena singomu a hogo.”