1 Atyetyart ilkwernemek awelhetyek. Akngeyel renh-rnem arrernek, rernem ingkerrenhek atyetyart anetyek. 2 Ingwer-rnem atyetyart-rnemek irrpelthirrenty, rernem Akngeyek irrpelthirrem arrpemarl. Rernem Akngey-kenh-angkwarr apmwelhilem. Akngeyel renh-rnem ayerneyenh. 3 Aray, Akngeyel renh-rnem rnkernek, rernem apmwernemant ater-anthetyek, mwerr-rnem ater-anthey-angenh anetyek. Nga arternp anetyek, atyetyart-rnem-kenh-angkwarr. Ikwer-penh arrantherr arternp anem, ikwer-rnem-kety aterirrey-angenh anetyek. 4 Atyetyart rernem Akngey-kenh warrkenh aneyel, ngenh mwerr arntarnt-aretyek. Nga apmwangkwarr anenty, nga kel aterirrem atyetyart ikwerety. Ra Akngey-kenh warrkenh aneyel, ranem apmwernem atwey-angker. 5 Alakenh-anyem nga atyetyart ngkwenhek awelhetyek, ngan irrkngerney awelheyel-angkwarr, ra ngenh atwekerr. Alakenh-anyem iterl-arelhetyek ntwarl mwerr-angkwarr arraty apentenh.

6 Alakenh-anyem arrantherr tax-areny atyetyart man anthayntetyek. Rernem Akngey-kenh warrkenh-rnem aneyel, rarl renh-rnem arrernek ingkerrenh. 7 Tax maney anthetyek mwerr-angkwarr. Ntwa man alhelenty, pwekap ngkwenh areyilenty, ntwa renh angkep anthem, atyetyart-rnemek awelhemel arraty-angkwarr.

8 Angkep antheman, man-rnem-then, ampwal-rnem-then. Alakenh renh arntarnt-arem. Ingwer arntarnt-arenty, Akngey-kenh angka arrwekeleny-angkwarr arraty aneman. 9 Angka arrwekeleny Akngey-kenh alakenh aynteyel: “Ingwer-kenh anewikw ikngwey-angenh anetyek. Ntwa ingwer ipmek atwey-angenh. Ntwa ampwal ingwer-kenh irrtyertel iney-angenh. Ntwa apmwal ingwer-kenh inetyek iterrey-angenh.” Angka akngerr aynteyel Akngey-kenh-angkwarr. Angka impen nhanyem, “Ingwer-rnem arntarnt-arem, ngkwenh-rnem arntarnt-arem-apeny.” 10 Ingwer-rnem arraty-angkwarr arntarnt-arenty, renh-rnem apmwiley-angenh. Alakenh-angkwarr apententy, kel Akngey-kenh arrwekeleny-angkwarr arraty apenteman.

11 Ingkart-kenh arlta arrerirreyelarl-kety, anwantherr arraty-angkwarr apenterl-ayntetyek iterretyek, anwantherr ikwer mpwelhetyek. Arlta ikwerenh arrer-anem, ra ikwerenh-rnem inerl-alpeyek apmer iteth-kenh-warl akngeyneyek. 12-13 Ingwerel-rnem apmwangkwarr mpwareyel ingwemerntel. Arltan ikwerenh arrer-anemarl rarl apey-alpeyenhan, ingkerrenhel renh-rnem areyenh, ingwemerntel-apeny aney-angenh. Terangk irrey-angenh, apmwangkwarr alhey-angenh, ingwer-kenh anewikw ikngwey-angenh. Atwerrey-angenh, ingwer-rnemek irrpelthirrey-angenh. 14 Arrantherr Ingkart Jesus Christ-ek iterretyek, ikwer awelhetyek, amentewarl alhey-angenh apmwangkwarr.