20
Artwa ilkwernemel Jesus ayerneyel ywarn-antey
(Matthew 21:23-27; Mark 11:27-33)
1 Arlta ingwerel Jesus aylpenhew tyaty ilkwewarl Jew-rnem-wenh-warl, rap angka mwerr-angker ilenh akngerrew. Artwa rltwernem Jew-rnem-wenh tyaty ilkwareny-rnem, artwa angka Moses-wenhew akalty-anthey-angker-rnem, artwamp-rnem-then rernem renh ayernew, 2 “Angwenhel ngenh thwenew, tyaty ilkwitwew akalty-antheyew? Atyetyart nthenh-apenyel ngenh thwenew, ingwer-rnem tharlemeley-angker-rnem tyaty ilkwethey irrent-aynteyew?”
3 Ra ikwer-rnem angkew, “Alerlay! Athetangkwel arrenhantherrenh ayerneyew. 4 John Baptise-emeley-angkerel akngerr kwaty-warl baptise-emelenh. Atyetyart nthenh-apenyel John thwenew? Akngeyel apek? Artwa ingwerel apek? Ayenh ilenherr-arey!”
5 Rernem arreyterrenh alakenh: “Nthakenh anantherr angkem? Nthakenh anantherr iley-angenh, ‘Akngeyel wenh John thwenew.’ Ra anenhantherrenh ayernewerr, ‘Kel ilek-wety arrantherr ikwer awelhey-angenh?’ 6 Nthakenh anantherr iley-angenh, ‘Artwa ingwerel renh thwenew.’ Ingwer-rnemel awewerr apmer nhenh-areny-rnemel, atwewerr-anem anenhantherrenh apwertel ipmew-antey. Rernem iterreyel, John Akngey-wenh angkakertarl anenh.”
7 Rernemap tyernew alakenh: “Anantherr iterl-arey-angenh, angwenhelarl John thwenew.”
8 Jesus ikwer-rnem angkew, “Arrantherr tyerney-angenh. Kel atha arrenhantherrenh iley-angenh, angwenhelarl ayenh thwenew, alakenh irreyew.”
Angka artwa katenew-artey-akert
(Matthew 21:33-46; Mark 12:1-12)
9 Jesus-el angka ingwer-anem ilenh. “Artwa ilkwel katen atnyenenh. Ra ilkelhew, amern grapes lyapelheleyew. Antywer-tangkwel ra akethelew, rap rnkerneynew arwerl grapes akely-akely-rnem-anem. Rap artwa ingwer-rnem arrernew, arwerl-rnem arntarnt-araynteyew, rarl aney-alpew-wety apmer ingwer-itwew intem-antey. 10 Arwerl-rnem ilkwerrew, amern ampeng-akert-anem. Artwa ilkwa rap warrkenh ikwerenh thwenew katen ikwer-warl. Rap ilanthew, ‘Katen ikwer-warl alha, grapes atyeng akngey-alpa.’ Artwa katen arntarnt-aremel-rnem renh arnarew. Rernemap antwerrkemel atwey-ayntew, renh irrentemel arrangkw-antey. Rap artwa ikwerew-artey iley-alpew.
11 Artwa ilkwel warrkenh ingwer-anem thwenew. Rernemap antwerrkemel atwey-ayntew, irrentemel renh arrangkw-antey arrpemarl. Warrkenh ra artwa ikwerew-artey iley-alpew. 12 Artwa ilkwa ra warrkenh ingwer-anem thwenew. Rernemap renh atwey-ayntew arrpemarl, parrik-angkwarr iwemel aketh-warl. Rap akwenterl-alhew, alpew-anem artwa ikwerew-artey iley-alpeyew.
13 Artwa ilkwa ra iterrew, ‘Nthakenh irrem ayeng? Alerey atyenh-anem atha thweney. Rernem mentyarl renh arey-ayntem, ran alerey atyenharl, ayengarl ikwer artewenty ilkelhem.’
14 Artwa katen arntarnt-aremel-rnem artwa alerikw renhan alhengk-aremel arnarew. ‘Nhak arenh-arey! Alerikw ikwerenh-anemarl apetyeyel! Aynikw ikwerenh ahaperrenty, rant-anem katenew-artey aneyenh. Atwey renh anantherr ipmew-antey, katen anewantherrenharl aynteyenh.’ 15 Rernemap renh atwey-ayntew, ipmanem iwemel parrik-angkwarr.”
Jesus-an angkew akngerrew awelhenh-rnemew, “Nthakenh irrem artwa ilkwa raw? 16 Rap alakenh apek irrem. Ra alhem katen ikwer-warl, atwem-anem artwa renh-rnem ingkerr ipmew-antey. Rap artwa ingwer-rnem-anem arrernem, katen arntarnt-araynteyew.”
Anaynteleyel: Jesus-el angka ilenh akngerrew atyetyartew-rnem-then, renh-rnem akalty-antheyew. Akngeyan atyetyart katenew-artey-apeny. Jew-rnemew-arteyarl ran. Jew-rnemelan katen arntarnt-areyel-apeny. Akngeyelan angkakert-rnem thwenenh ikwer-rnem-warl. Rerneman awelhey-angenh, atwey-ayntenh renh-rnem. Rap Alerikw ikwerenh-anem thwenew ikwer-rnem-warl. Irrkaty rerneman Alerikw atwew ipmew.
Artwa ilkwernemelarl Jesus awew apateyelpemel. Rernemap angkew, “Alakenh angkey-angenh!” Angka rernem awew-penh, artwa ilkwernem-then ingwer-rnem-then angkew Jesus-ew, “Artwa katenew-artey nthakenh ingwer-rnem atwey-angenh. Ran amperrngerremer ikwer-rnem, atwey-angenh menty.”
17 Jesus-el renh-rnem aremel angkanem ilew, artwa ilkwernemel aweyew. “Alakenhan aynteyel. Awelhenh-arey arrantherr!
‘Artwernem iterrew, lywenty mpwareyew. Irrkernem-anem angernew, arwerl-rnem 4-anem rnkernew. Arwerl arlpenty rlterrk atherr-anem arrernew ltweper. Rernemap arew arrpemarl, arwerl ingwer angkeparl iweynew apmwarrpantey. Arwerl ranap impen inngarl, nthakenh iwey-angenh, lywenty rlterrk antwerrkey-angker.’ ”
18 Jesus angkew arrpemarl ikwer-rnem, “Ingwerentyel angka atyenh awey-angenh, Akngeyelan renh court-emeleyenh. Thwenem renh rwa ilkwewarl, aletharl ampeyel-warl.”
Angka apwertarl antheyel-akert atyetyart ilkwa Rome-areny ikwer
(Matthew 22:15-22; Mark 12:13-17)
19 Artwa rltwernem Jew-rnem-wenh tyaty ilkwareny-rnem artwa angka Moses-wenhew akalty-anthey-angker-rnem-then rernem angka awew, Jesus-elarl ilenh. Rernemap ahelerremel iterrenh, “Angka weth artwa katen arntarnt-arenh-rnem-akert ran anenhantherrenh-apenyarl ileyel. Jesus-el apmwa antweyel anenhantherrenh artwa renh-rnem-apeny. Antwerrkey anantherr renh!” Akngerrarl anenh-wety, rernem ywarn iterrew, renh antwerrkeyew. 20 Rernemap mpwelhenh, renh arrkernemel antwerrkeyew. Rernem iterrenh alakenh, “Anantherr renh antwerrkem, renhap artwa kapment-areny ikwer-warl atnwenheyew, renh court-emeleyew. Rap artwa ahelengkw-rnem ilanthem, renh ipmew atweyew.”
Ikwer-penhan atyetyart ilkwernem Jew-rnem-wenh rernem warrkenh-rnem thwenew Jesus-warl. Rernemarl alpenhel, rernem alakenh iterreynenh, “Anantherr angka ikwerenh awem-penh, ilemel court-angkwarr, Jesus rernem ipmew atweyew.” 21 Jesus rernem alakenh irrtyertel ayernew, “Atyetyartay, nga arraty-angkwarr angkeyel ingkerrew. Ntwan akalty-antheyel Akngey-wenh-angkwarran arratyan. Alhewerarl irrkaty-angkwarr ntwa ileyel ingkerrew, artwa ilkwetyilkw-then ingwer-rnem-then. 22 Ila anenhantherrenh, nthakenh nga iterreyel? Jew-rnem anantherran apwert anthemang atyetyart ilkwa Rome-areny ikwer, rarl anenhantherrenh ilantheyel-angkwarr? Arrangkw apek?”
23 Jesus-el iterl-arew, rernem irrtyertelarl ayernenh, rap iterrenh, “Yanh-rnemel ayenh ayerneyel irrtywerremel. Rernem ayenh aweyew, apmwel-ayeth angkentyew. Rernem iterreyel, angka atyenh apmwarl, pip kapment-wenh apentey-angenh. Rernem iterrem, ayengarl alakenh angkem, ‘Kapmentew apwert anthey-angenh. Arrantherr apwert Akngeyewant arrernem.’ ” Alakenharl iterrenh-penh, rap angkew ikwer-rnem, 24 “Apwert anyent atyeng akngetyenh-arey, atha areyew.” Rernemap akngetyew, anthew-anem. “Arrantherr ayenh ilenh-arey, inngerr angwenh-wenh? Itna ilek?”
25 Rernem tyernew, “Atyetyart ilkwa Rome-areny.”
“Kelap. Ingkerr ilek-ilek atyetyart Rome-areny-wenh arrantherr ikwerarl anthemer. Ingkerr ilek-ilek Akngey-wenhan arrantherr ikwer anthemer.”
26 Angka awew-penh, warrkenh-rnem angkerrew, “Nhenhan arraty angkeyel. Ran anenhantherrenh ilemer, apwert kapmentew anthewerr. Ranap alakenh angkey-angenh. Nthakenharlap anantherr ileyenh court-angkwarr renh?” Rernemap akeleyt-anem rtnenherrenh, angkerrey-angenh.
Ipmepenh angkep itetherrey-angker-akert
(Matthew 22:23-33; Mark 12:18-27)
27 Ikwer-penh artwa ilkwa ingwer-rnem apetyew Jesus-warl, renh ayerneyew, itnan Sadducee-rnem. Rernem apmwel-ayeth iterrenh alakenh: “Ingwerenty nthakenh ipmepenh itetherrey-angenh. Ipma intemarl ayntem.” 28 Rernem angkew ikwer, “Atyetyartay, awank-akerr Moses-el angka rlterrk nhenh ingkwernenh anewantherr:
‘Iteng anem ampeweny apek. Artwa ra ahaperrenty, ayteyikw ikwerenhel-anem amarl inpert inem, ampa aneyew. Ratherr iterremer alakenh, “Ampa nhenh awayikw-wenh-apeny.” ’
29 Awelha angka nhenhew. Awayenheng-rnem 7 anenh. Artwa arrwekeleny-tangkwel itengerrew, rap ahaperrenhew, ampa ikwer-atherr aney-angenh-antey. Arelh ikwerenh inpert-anemarl. 30 Ayteyikwel-anem arelh renh inew, rap ahaperrenhew, ampa ikwer-atherr aney-angenh-antey. 31 Ayteyikw ingwerel-anem arelh renh inew, rap ahaperrenhew arrpemarl, ampa ikwer-atherr aney-angenh-antey. Ikwerel-antey awayenheng-rnemel arelh anyent renh ineynenh. Anyentarl-anyentarlap rernem ahaperreynew ampeweny-antey. 32 Arelh inpert rant-anem iteth anenh intem. Ingwer-ingweran ranem ahaperrew. 33 Kel anantherr ngenh ayerneyew angka nhenhew. Akngerran iterrem, anantherr itetherrem ipmethey. Kel ingwer-ingwer ingkerrenh angkep itetherrenty ipmepenh, nthek-apenyarlap mpwernikw inngan ikwerenh aneyenh? Artwernem 7-ew ra inperterrew.”
34 Jesus angkew artwa Sadducee ikwer-rnem, “Aleyan ahern nhenh-itwew apmelerrel-ayeth artwethen arelh-then itengerrem. 35-36 Ingwer-ingwer Akngey-wenh-rnem ahaperreyenh, ipmepenhanap rernem itetherrem angkep arrpemarl. Rernemap antyerl-apeny-anem aney-alpeyenh, nthakenh itengerrey-angenh, arrangkw-anem. Nthakenh ahaperrey-angenh arrpemarl. Akngey-wenh ampernem-anem rerneman aneyenh, ikwerel-arleng intem-antey aney-alpeyenh. 37 Inngarl aynteyel, akngerran angkep itetherreyenh ipmethey, alpeyenh aney-alpeyenh Akngey-itwel. Arrantherr angka Akngey-wenh iterl-areyel. Arrantherrap iterl-aremer angka weth Moses-akert, rarl arew, rwarl ampenh arwerl-itwew. Reytemarl ilem-penh arrantherr mwanty iterl-aremer. Akngeyan angkew Moses-ew alakenh, ‘Ayengan Abraham-ew-artey aneyel, Isaac-ew-artey, Jacob-ew-artey.’ 38 Rernemanap iteth-anteyarl aneyel! Akngey atyetyart aney-angenh ipmernemewan. Ran atyetyart aneyel iteth-rnemewant. Ikwerenh-angkwarran anantherr ingkerrenh iteth intemarl anem ipmepenh.”
39 Artwa angka Moses-wenhew akalty-anthey-angker-rnem rernem awelhenh-antey. Rernemap angkew, “Arraty-angkwarr nga angkeyel!” 40 Ikwer-penh-antey artwa ilkwernem ater-anemarl irrenh, renh ayernewerr.
Artwa Christ ra atyetyart ingwer-lkwer David-angkwarran
(Matthew 22:41-45; Mark 12:35-37)
41 Jesus angkew ikwer-rnem, “Artwa Christ-alew? Akngeyel ilew, renharl ahern nhenh-warl thweneyew. Akngerran apmwel-ayethan angkem alakenh, ‘Artwa Christ ran atyetyart ahern nhareny-rnemewant, Atyetyart David-apeny. Christ ranap David-wenh-antey.’ Ilekewarl rerneman apmwel-ayeth alakenharl angkeyel? Rernem iterl-aremer, Christ ranap Akngey-areny. Ran David-angkwarr ilkwarl. 42 Awank-akerr David-el aylelhenty nhenh ingkwernew pip Psalms-ewan:
‘Akngey angkew atyetyart atyenh-warl Christ-warl:
“Ngan ana arrerenty atyengel-arleng arraty-angkwarrarl.
43 Ingwer-rnem ngkweng-wety artewenty arlkarerreyel-rnem atha atweyenh, renh-rnem ngkweng-wety irrentemel.” ’
44 Atyetyart David-el artwa Christ itnewew ‘Atyetyart atyenh’. Christ ranap ilkwarl Atyetyart David-angkwarr. Ranap Akngey-areny.”
Tangkey-angenh
(Matthew 23:1-7; Mark 12:38-40)
45 Akngerran anenh apmer ikwer-itwew, awelherrenh Jesus-ew. Rap angkew kwertengerl 12 ikwerenh-rnemew, 46 “Mwanty anenherr-arey arrantherr! Artwa yanh-rnem iwarrerney-angenh, rerneman angka Moses-wenhew akalty-anthey-angker. Irrtywalth rernem. Rernem aylpem arnkwa mwerr-angker arlpentyel, ingwer-rnemel renh-rnem nakemel araynteyew-awaty. Rerneman inkwerelhem, ingwer-rnemarl ikwer-rnem kwenerrey-alhem, atyetyart ilkwa antwemel. Rernem aylpenty tyaty Jew-rnem-wenh-warl, arrwekel-antey aney-alhem, ingwer-rnemel renh-rnem araynteyew-awaty. Akngerrarl akarrerremeng-arey, amern inkwerelhemel kwenty arlkweyew, rernem arrwekel-antey aney-alhem, ingwer-rnemel renh-rnem araynteyew-awaty. 47 Rernem arelh inpert-rnemew apmwel-ayeth mpwarem, ilek-ilek rakemel warl ikwer-rnem-wenh-they. Rernem irrtywerremel angkeyel Akngey-warl-athek arleng-alenty. Akngeyelarl ingkerrenh court-emeleyenh, rap renh-rnem irrwampenh-antheyenh, irrtywalth renh-rnem. Ingwer-rneman ra alyepel irrwampenh-antheyenh.”