1 Apajuí múun, ashí senchigtina nunú

kuitamsam pujauk,

2 Tuke Pujuun chichajak: “Ametme

mina ejamataijuk,

wi uumka ayamjumataig.

¡Ametme mina Apajuíg,

ima aminig kajintsan anentaimjai!” tawai.

3 Wakan pegkegchau

utugchatan apujtugmataish,

tuja jata aidaunmashkam

ima nigki ayamjutpamainai.

4 Wagki niig atash niina nanapen uchuchiji aidaun

dukuka kuitamama numamtuk kuitamjamnai,

nuadui amek puyattsuk

shiig aneasam pujustinaitme.

¡Niina anenkega duwi

aminak tantag ejamatia numamtuk

ejapak kuitamjamkattawai!

5 Nuadui kashi ishamainnum pujakmesh,

tuja tsawai wekaekumesh,

mantuachagtimpash tusamek ishamkaipa.

6 Tuja jata kashi magkagtin,

tsawai magkagtinkesh iyanjugmatai,

jakashtajash tusamek ishamkaipa.

7 Amina menagmea nuni mil aents jinitnai,

tuja untsugmea nunishkam

diez mil aents jinitnai,

tujash amek makichkish wajukashtinaitme.

8 Untsu aents pegkegchau aidaun Apajuí suwimak susam jinuidau waintinaitme,

9 wagki aminak Tuke Pujuu múun,

ashí senchigtina nunú

ejapak kuitamjamu asamtai.

10 Aminak makichik pegkegchaukesh

waitkagmaschatnai,

tuja jatashkam amina jeminig utugmashtinai.

11 Wagki Apajuí ángel aidaun ishiaktatui

ame tuwi wekaetatme nuwi kuitamjamkatnun.

12 Nunú ángel aidau achigmaku agtatui,

kaya tukumak iyajai tusa.

13 Nuadui, ikamyawa yukagtin aidau,

tuja tikich kuntin ishamain ayaunum

wekaekumesh, uyumat aneakas wekaetatme.

14 Apajuí chichaak:

“Juju aentsuk mina waitui,

anentanash anentui, nuniau asamtai

wi niinak ayamjukan uwemtikjattajai.

15 Tuja yainkati tusa mina segatkuishkam,

aiktinaitjai, dutikakun ¡niijaig pujutnaitjai!

¡Tuja waitiakuishkam agkanmitkatnaitjai!

¡Dutikakun eme anentsa diitai awajsatnaitjai!

16 Tuja kuashat mijan

shiig pujustin ati titinaitjai.

¡Dutikakun pujut nagkanchau tuke atina nuwi pujus

dakujusti tusan jukitnaitjai!” tawai Apajuí.