1 Tuke Pujuuwah, wi kantamkunuk,

amek tuke wait anenkagtinaitme titatjame,

tusan aju ajumag kantamjittagme.

2 Nuniakun amina anenkem tuke auwa nuna,

tuja ame anagkagtuamuk

nayaim yapajinchauwa imana nuna etsegkattajai.

3 Amek Davidjai chichamak umikuitme;

dutikau asam nii anagkuakum:

4 “Ame jakaminig,

ame wegantunmaya apu wajasa

ame pujusa inamtaigmin pujus inamjatnai”,

tiuwaitme.

5-7 Chah, Tuke Pujuuwah,

nayaim aidauk amina takatjum pegkeja

nuna diisag emematjamainawai,

tuja ashí ángel aidauk

amina anenkagmin pachisag chichainawai;

ima aminak eme anenjamainawai.

Tuke Pujuuwah, ametme

tikich aents aidaun apajuíji aina

nuna nagkaesau ishamtai dekas muunmek.

8 Tuke Pujuu ashí senchigtinuh,

ame senchigtinum chichakbaugmek

betek uminaitam imanuk tikichik

makichkish atsawai.

9 Ame nayantsak inau asam,

tsukatak ishamain wajakuish,

mijaakta tusam imijiame.

10 Nayantsanmaya kuntin múun depetkam,

amina senchigmin shiwaajum aidau

uwaakam ipisjabiume.

11 Nayaim, nugka aina duka aminu ainawai,

ame nugkak, tuja ashí nugkanum

ayá nujai najankauwaitme.

12 Tsumujinish, nujinchinish

ame ashí nugkak najanauwaitme.

Tuja muja Tabor, muja Hermógjai

amina daagmin pachisag kantamainawai.

13 Amina kuntugmek senchigtinai,

tuja amina uwejum untsuja dushakam

senchigtin depetbauwai.

14 Amek pegkegnum anenkajai inaame,

tujash nuna nagkaesau dekas

amina anenkagmin

tuke kuitamkagtame.

15-16 Chah, Tuke Pujuuwah,

aents amina emematjamin,

amina tsaaptinjumin wekayin,

tuja amina takatjum pegkegma nuna diis

tuke shiig anea duka

amek eme anentame,

dutikakum pegkegnum yumigkiame.

17 Wagki dita imanji aina duka,

tuja senchiji aina nujai ame susauwaitme.

Nuadui jutii aidautik aan nagkaemasam

senchigtin ekagtame.

18 Israel aents aidaun Apajuíji, Tuke Pujuuwah,

ametme iina apuji pegkegmamek,

tuja ametme ejajatkam kuitamkagtaumek.

19-20 Amina chichamjumin etsejin

yaunchuk kajanum chichagkum:

“Mina aentsug aina nuwiyan

makichik wajiun etegkajai,

duka mina inakeg Davitai,

wi niinak yaigkan, chichame antugtai emajai.

Dutikan ¡Israel aents aidaun apuji adaikajai!

21 Niinak yaitskek idaisashtinaitjai.

Mina senchigjai senchimtikatnaitjai.

22 Niina shiwaaji aidaush jetekchagtin ainawai,

tuja aents pegkegchau aidaushkam

depetkachagtin ainawai.

23 Niina shiwaaji aidaunak

niish wainaig ijinatnaitjai,

tuja niina kajejuidaunash ijinatnaitjai.

24 Wi niina aneamua duka tuke atinai,

wi kuitamsam kuashat kaweg

senchigtin wajastinai.

25 Tuja niig nayants Mediterraneo tutaya

nuwi nagkamas namak

Eufratesa aatus inamjatnai.

26 Tuja nii chichagtak:

‘Ametme mina apag kuitamjaumek;

tuja ametme mina Apajuíg uwemtijinmek’, tujuttinai.

27 Tuja wi niinak mina uchig iwai,

ashí tikich apu aidaunash

nagkaesau apu emattajai.

28 Wika niinak tuke anetnaitjai,

tuja wi niijai chichaman umikuitag

dushakam tuke atinai.

29 Nayaim awa nunisag aigkik,

niina uchiji wegantu aidaunmayag

tuke apu wegagtin ainawai.

30 Untsu dita chicham umiktinun

wi jintintuau ainag nuna

kajimatkiag batsamas,

31 nunú chichaman uminachkuig,

32 dita pegkegchaujin

suwimak ishamainun susatnaitjai.

33 Untsu Davidnak tuke anetnaitjai,

tuja wi niina anagkuawaitag nunashkam

umitskek idaisashtinaitjai.

34 Wi niijai chichaman umikuitag nunak

tuke idaisashtinaitjai,

nunak tuke umiktinaitjai.

35 Makichik tsawantai

wi Davitan anagkuawaitag nunak

dekas umiktatjai tusan tumamjai.

36 Etsa eketa nunisag eketaigkik,

niina uchiji wegantu aidauk

tuke apu wegagtin ainawai.

37 ¡Nii wegantu aidauk,

nantu tuke ekemna iman atinai!

¡Nii pujusa inamtaijishkam nayaim tuke auwa iman atinai!” tiuwaitme.

38 Tusa tiuwaitkum ame apu etegkamu aig,

kajegkam dakitja idaisaume.

39 Dutikau asam niijai chicham umikuitam duka

umitsuk, David kajimatkim idaisaume.

40 Tuja yaakat Jerusalén peejamua dushakam

yumpua tsaikam ayamjumamainchau

emam idaisaume.

41 Ashí aents nuni nagkaemaidauk

wayawag dita wakegamun kasamainawai,

tuja aents dita nugkega nuna yantamen

batsamin aidau dushikinawai.

42 Nuadui Davita shiwaaji aidauk shiig anenawai,

wagki dita ima senchijinawaju asag.

43 Niina maanitaiji puyagshakam atankiume;

dutikau asam maaniakuish yaigchaume.

44 Eme anentai aajakua duka

wainkauch idaisaume;

dutikakum apu wajasa inamtaijishkam

tikima wainkauch awajtusume.

45 Tuja nuigtush kuashat mijan

pujuschati tusam atankiume,

dutikakum datsa datsantak awajsaume.

46 Chah, Tuke Pujuuwah,

¿uumjutkamek pujuttam?

¿Kajegtukbaukek pujuttam?

47 Apuh, mina pujutug piipichia nunú adeagta;

ame aents najanamua duka

ujumak tsawantak pujus jauwai.

48 ¡Makichik aentsuk jatsukek iwakuk pujumaitsui!

¡Tuja jakashtajai tusa,

jata uwemtumainchakam makichkish atsawai!

49 Apuh, ¿ame yama nagkamchakum:

Davita tuke anetnaitjame tusam

tiuwaitam dusha wajukame?

50 Apuh, iinak kuashat dushiktamainawai,

imatika dushiktamainakuish atsaneaji.

51 Tuke Pujuuwah, amina shiwaajum aidau

¡aatus iina pegkegchaun chichagtamainawai!

¡Aatus ame apu etegkamua nuna

aju ajumag pegkegchaun chichajuinawai!

52 ¡Tuke Pujuuk, tuke pegkegnum chichagtai atin ati!

Maake, aatus ati.