84
Apajuí jee pegkegma nuwi pujustasan ima senchi wakegajai
Coré uchiji aidau kantamawagbau
1 ¡Tuke Pujuu, ashí senchigtinuh,
amina jemea duka shiig pegkejai!
2 ¡Wika Tuke Pujuu jee pegkegma nuwi pujustasan
shiig senchi wakegajai!
¡Nuniakun Apajuí pujuta sukagtina nuna
shiig anentsan senchi kantamjajai!
3 Tuke Pujuuwah, ametme ashí senchigtinum.
Mina apug, Apajuíjuh,
tiki pishakchikesh amina jemin waya,
pasugmak uchijin muumpitkamainuk
agkantak ayawai.
4 ¡Amina jem pegkegma nuwi pujuidauk
shiig aneasag batsatainawai,
nunidau asag amina emematjamtanak
makichkish mijamainatsui!
5 Tuja aents aidau aminiyan
senchimetan juwina duka shiig aneasagtatui,
tuja amina jemin minitag tusa
wakeyin aina dushakam shiig aneasagtatui.
6 Nugka paka buutbau tutai
yumi atsaunum weakush,
yumi pukuni jiinaidaun waintinai;
tuja yumigmat taimunmaya yumi
kuyua megkaetaish, yumi yutak
ashí nugka waa aidaunmak pimasua waigtinai.
7 Apajuíyah, amina senchigmejai
ditak tuké senchimeawagtinai.
Tuja Siógnum jegawag
Apajuí senchigtina nuna wainkagtinai.
8 Tuke Pujuu, ashí senchigtin,
Jacopan Apajuíjiyah,
¡wi sumamush antugtukta!
9 Apajuíyah, jutii ejamaktin
ame etegkam apu emauwaitam
nunú shiig anentsam kuitamkata.
10 Amina jem pegkegma nuwi waya,
makichik tsawan pujamua duka,
mil tsawan agá pujumaina
nuna nagkaesau ima pegkejai.
Wika aents pegkegchau aina nujai
ijunja pujutnak idaikun,
dekas amina jem pegkegman waitijiya nuna
kuitamin atajai tusan wakegajai.
11 Wagki Tuke Pujuu Apajuí iinak ejapak kuitamjamui;
tuja aents tudau takatsuk batsata nunak,
nii wait anentak eme anentus kuitamui,
dutikak waji pegkeg aidaunak sujitatsui.
12 Tuke Pujuu, ashí senchigtinuh,
¡aminí kajinmamas anentaimaidauk
shiig aneasagtinai!