1 “¿Amesh dekamek cabra ikamia aina dusha

ejapjukajash, wajupa asag petsajawa?

Tuja ¿japa petsaidaush wainnukum?

2 ¡Amek wajupa nantu asag

petsajawa duka dekatsme!

3 Japak petsaktinji tsawan jegajim,

uchijin najaimakug

nugká tepes petsauwai.

4 Dutika petsakam chichiag

ikam pujus muumpawai.

Nunik dukujin ukuak

kanaka yaja wenawai,

nunika ataktu wakitkig dukujinig tainatsui.

5 “¿Ya burro ikamia aina nunash

waitkaschamu agtinme tusash tiuwaita?

¿Ya ditanash agkan

yujatnash susauwaita?

6 Wi ditak uwegshunum,

nuigtu nugka paka

kachi tepaju asamtai,

dupa tsapachu aina nuwi

batsamsatnume tusan etegtuawaitjai.

7 Tuja yaaktanmaya aidauk senchi pampainak dakitmain wajaidau asagmatai,

nuna dakituinak atushat batsatui,

nunidau asag aents aidau

burro tagkumamu aidaun inainak

jiyainamunashkam antuinatsui.

8 Nunik batsamas dita yuwatnujin

dupan egainak mujanum yujainawai.

9 “¡Amek toro ikamia aina nunuwap

wi takatai yainkag, kiitai

mina tagkuju batsamtain

kajigkagtatua tusamek tumaitsume!

10 ¡Tuja nugka pukugti tusamek

jigkaja emetuamek waitkamaitsume!

¡Nuigtush nugka pukugbaun

tsaikti tusamesh tumaitsume!

11 ¡Nunú senchigtin ainakuishkam,

amek dita takagtustinme

tusamek ditakek idaimaitsume!

12 ¡Ame ajakmamu aina

nunak ditaap juuka

ikaunma ijumjutjattawa

tusamek tumaitsume!

13 “Avestruzak shiig aneak,

nanapen awagtumawai,

tujash avestruzak shiijak awajkagtuchui.

14 Tuja avestruzak kamatkan tai,

nuwi petsaka etsa sukuam, nimpak takiagti tusa pachitsuk idainai.

15 Tuja niig makichik aentskesh,

nuniachkush kuntinkesh dajag

tsaikchaintash tusag anentaimtsui.

16 Avestruzak uchijinash

niina uchijichu itugmaina

numamtuk awagnai,

tuja megkaekachaintash

tusagkesh puyatjuchui.

17 Nunak nuniawai, wagki

wi unuimatan susachuitag nuadui,

tuja shiig jintiaja

anentaimtanashkam susachuitjai.

18 Untsu nantaki tupikakug caballo aidaunak

aents nuwi entsatkau aidaujaí

juwiachu asamtai dushikiawai,

wagki nii ima senchi tupikau asa.

19 “¿Amekaitam caballo

aidau senchimtikaum?

tuja ¿amekaitam caballo kuntujen

intash tumain pegkeg

ajuwama nunú najatuaum?

20 ¿Manchi tsekegama imanik tsekeak,

senchi mayatak aentsun uwakna

nunú ameka dutikam?

21 Caballo aidauk maaniatasa ijumjamak

sapigmakas ejapkabiag,

aents niini entsatkau

aidau shiwagjai igkunia

maaniati tusa tupikauwame.

22 Tuja suntag aidau maanitain yajuakag uminas ijunun wainkush,

ishamtsuk tupikatki jetegame.

23 Tuja suntag aidau flecha chimpia jutain

caballo aenskam tupikainak

tatagtutaish, ishamchauwai.

Tuja nagki aidau, flecha aidau akenbau

winchantutaish, ishamchauwai.

24 Maaniatatus uwija kachujin umpuiniagtaish,

caballo aidauk jasa ijunmainchau dekapenak,

tupikatiagtai, suntag nuwi entsatkau aidaushkam

kakajus emetmainchau dekapajame.

25 Maaniatnume tusa

uwija kachuji umpuamun

caballo aidau antuinakug,

aentsjai betek pampauwame,

tuja atushat ijuntsag

maaniamu ataik dekapeajame.

Tuja suntaja apuji aidau

dita suntajin chichajuinamunak,

suntag aidau pampaidaujai

atushat wajasag antinai.

26 “Tuja pinchu aidau

yakí nanaak yujas

etsa minitaiya nuni yuja nunú

¿ameka amina yachagmin

nuniktinme tusam tiuwaitam?

27 Tuja ¿ameka ukukui aidau

yakí nanaak yujau atinme,

nuninak yakí kayanum pasugmakag

nuwi petsau atinme tusam tiuwaitam?

28 Ukukuik yakí kayanum pujuuwai.

Tuja nunú kaya yakí jiitkauwa nunuwai

nii pujusa ayamjumatai,

jega peejamua numamtina duka.

29 Imanui yakí pujus

yutaijin wainak akaetuki maa yuwame.

30 Ukukuik tuwi jakau

tepawa nuna tuwajui,

tuja uchiji aidauk

nuna neje uduun yuwinak

shiig aneen ainawai”,