3
Profetan takatji
1 Israel aents aidauwah, atum Egipto nugkanum batsamsajum waitu batsatutigmin Tuke Pujuu jiipag agkanmitkagmawa nuna chichame antuktajum:
2 “Ashí nugkanum aentsuk ayaig,
ima atumnak etegkauwaitjime.
Dutikamuitkujum pegkegchau takamsau asajum,
nunú umiakjum diwimkagtukbau akikmamaina numamtuk
suwimak jukittajume.
3 “Jimag aents tsanigka wekaga nunak,
mai antugdayas wekagu asa aniawai.
4 León shinakug, kuntinjin maa akasmatak shinawai,
tuja leónka uchiji waanum shinakug,
kuntinjin mau asa akasmatak shinawai.
5 Pishak nemak pujakug,
nemaktinji detua ukukbaunum nemawai.
Kuntin achiktasa dakamtika ukukbau
tsekea nunak achika aniawai.
6 Trompeta yaaktanum shidaun antuinakug,
aents aidauk pampainawai.
Utugchat yaaktanum nagkaema duka
Tuke Pujuu nunikti tibau asa nuniawai.
7 Tuke Pujuu niina aentsji profeta aidaun
dekamtiktsukek nii wakegamu ataish,
nigkik makichkish dutikatsui.
8 León shinaun antuinakug,
ashí ishamainak kujain ainawai.
Tuja Tuke Pujuu profetan chichakti tamak
niina daajin chichamainai”, tawai Apajuí.
Yaakat Samaria tsayam atin
9 Ashdotan apuji aidau batsatbaunum,
Egipto apuji aidau batsatbaunum
chicham etsegkujum:
“Samaria mujaji aina nuwi kaunatajum”,
tusajum ijumjatajum,
nuwi ijunas Samaria nugkanum
magkagtuinamu pegkegchau takainamujai
pachimnaga awa nuna wainkatnume.
10 Tuke Pujuu chichaak:
“Samarianmaya aidauk shiijak takainatsui,
aents aidaun mainak wajiji yajutkamu aidaun
dita pujusa inamtaijin ijumag batsamtawai.”
11 Nuadui Tuke Pujuu chichaak:
“Shiwag aidau yaakat Samarian jetektatus tenteawagtatui,
dutika jetekag kaya jegamkamu aidaunak tsaikag,
apu pujusa inamtaijin waji ayaunak
ashí yajuakagtatui”, tawai.
12 Tuja junashkam Tuke Pujuu chichaak:
“Uwija kuitamin uwigji yujam ayamjuktatus
maanitkush ayatak jimag nawe ampigbaun
nuniachkush kuishi ampigbaunakesh,
juwama numamtuk
atum samarianmaya aidautijum
Damasconmaya jáanch pegkeg ainkajum
kaji batsatjum duka
pisakjum piipich jukijum pisagtatjume.”
13 Nuadui Tuke Pujuu ashí senchigtina nunú ataktu chichaak:
“Antuktajum atum aidautijum,
nunikjum Jacob wegantu aidau
suwimkan jukiagtata nunú pachisjum etsegkatajum.
14 Wika dita pegkegchau takamsamujin
suwimkan susagtatjai,
dutikakun Betelnum dita apajuímtaijin emematuinak
altar najankamu ayá nunak ashí tsaiktatjai,
dutika ai nugká batsamsattawai.
15 Wiakchan jee aidau, tsetsek tepeamtai kanutai,
jega pegkeg umikbau aina nunak,
esattin kanutai aina nujai tsaiktatjai.
Tuja jega marfil jegamkamu aina nunashkam tsaiktatjai,
tuja jega apu pujusag inamaina nunashkam
ashí tsaiktatjai”, tawai Tuke Pujuu.