1 Wikia Yusrun kintajai metek:

Ameketme pengkeram titatjai.

Wina jangkerjai tuke Yus juuntaitai titatjai.

2 Wikia Yusrun nintimtusan:

Nekas kakarmaitai tajai.

Jampechu ainautirmeka nu antukrum warastaram.

3 Iijai metek mash iruntrar ii Apuri naari pachisar:

Yuska nekas juuntaitai tiarmi.

4 Wikia Yusrun seam ni anturtukmiayi.

Tura ni shamtsuk asata tusa angkanmamtikruamiayi.

5 Wina Yusrun nintimsar pujuinauka nukap warainawai.

Tura pengké natsaamtsuk pujusartin ainawai.

6 Wikia mianchau asan,

shamakun untsumkinij wajamiajai.

Wi turamtai wina Yusur anturtuk:

Shamtsuk pujusta tusa,

itiurkachminnum pujaing angkanmamtikruamiayi.

7 Yuse awemamuri Yus nintimsar pujuinautin tuke waitmaku asamtai uwemtikramratnuitji.

8 Yus pengkerashi tusaram nekaatasrum wakerakrumka,

tenap nintimsaram nekaataram.

Aints Yusen nintimsar pujuinauka nekasar pengker nintimsar pujusartin ainawai.

9 Yus umirkautiram atumi Apuri nintimtusrum:

Ameketme juuntam titaram.

Iikia tuke nintijai ni umirkarkia yuumakchatnuitji.

10 Kuikiartin ainauka kuikiartichu wajasar yuumakartin ainawai.

Antsu ii Apuri seautikia nekasar pengker pujustinka yuumakchatnuitji.

11 Uchir ainautiram,

wini winiram anturtitaram.

Itiur ii Yusri pengker awajsatnuitji tusan,

atumin nuiniartasan wakerajrume.

12 Atumka pengker nintimsaram wara warat pujustasrum wakerakrumka,

13 pasé chichamka chichatsuk asataram.

Tura wait chichamsha etsertsuk asataram.

14 Tura pasé aa nuka mash inaisaram,

pengker aa nuke turin ataram.

Turakrum angkan pengker nintimsar pujut wakerin ataram.

15 Ii Apuri Yuska nekas pengke nintintin ainaun wainin asa,

ni seamuncha anturui.

16 Antsu tunau takau ainaunka nakitawai.

Tura nu aintsu naarin chikich aints ainau nintimtsuk asarti tusa kajinmamtikui.✡ 1 Pe 3.10-12

17 Yuska pengker nintintin ainau seamurinka anturui.

Tura itiurkachminnum pujuinamtaikia,

shamtsuk pujusarti tusa angkanmamtikui.

18 Ii Yusringkia arakchichuitai.

Tura asa aints:

Wikia mengkaakatnuapitja tusar,

napchau nintimsar pujuinaunka uwemtikratnuitai.

19 Pengke nintintin itiurkachminnum nukap wait wajainau wainiat,

ii Yusri mash angkanmamtiknuitai.

20 Ni kunchincha kupirkacharti tusa wainuitai.

Tura asamtai kichkisha kupirkachartinuitai.✡ Juan 19.36

21 Pasé aints ainau ni tunaarijai jakartin ainawai.

Tura pengke nintintin ainaun tsuutinauka wait wajakartin ainawai.

22 Antsu ii Yusri ni inatiri ainaun uwemtikratnuitai.

Tura Yusen nekasampita tinu ainaunka wait wajaktintrinka susashtinuitai.