1 Apuru ame ejarkata tusan seajme.

Nunia inatsturaip tusan seajme.

Ame nekas pengker asam uwemtikrurta.

2 Wait aneasam tsuntsumaam tenap anturtukam,

wári angkanmamtikruata.

Aints pampanam wajas angkan wajawa nunismek wina ejarkata.

Tura aints jea wenurmaunum ni nemasen shamtsuk pujawa nunismek pujusta tusam uwemtikrurta.

3 Ameka nekasam pampa muchikchamin aa nunisketme.

Turasha wenuk yumpunkachmin aa nunisketme.

Ame tame nuka tuke umiu asam jintintruata,

tura waitkata tusan,

ami naarmin pachisan seajme.

4 Aints kuntinun achikiartas ajatinawa nunisarang aints ainau wina achirkartas wakerutinawai.

Tura asaramtai ame wina ejarkatin asam angkanmamtikruata.

5 Wina wakantruka ame waitrukta.

Apuru ame nekasam Yus asam wina ayamrutkata.✡ Luc 23.46; Hech 7.59

6 Aints ainau Yuschau waininayat ni yusrin:

Ameketme yusem tinaunka pengké nakitajai.

Antsu wikia:

Nekasampita tau asan amin nintimtusan pujajme.

7 Ame anenme nuna nekau asan,

pengker nintimsan waraajai.

Tura wi wake mesekan pujamur nekau asam,

ameka wait wajamursha waitme.

8 Tura wina nemasur ainau maawarti tusamka tsangkamrukchamame.

Antsu aints nungka muchkachminum pujawa nunismek pujusta tusam winaka waitnuyame.

9 Apuru wikia itiurkachminum pujau asamtai wait anentrurta.

Nukap juutu asamtai,

wina jiiruka najamrutak kusuri.

Turasha wina namangkruka mash pimpi pimpi nekapeajai.

10 Wikia najaimiakun juutu pujau asamtai,

wina pujutruka kichik musachia nunisang wári amuawai.

Nukap wake mesekan pujau asan,

kakarchamin nekapeajai.

Tura wina namangkrusha pimpi pimpi nekapeajai.

11 Wina nemasur ainauka nukap wishikrinawai.

Tura wina irutkamur ainausha wishikrami tusar,

wina pachitsar pasé chichartinawai.

Tura wi jintanam wekaamtai,

wina waintair ainausha wina waitan nakitrinak ajapruwar ukurinawai.

12 Aints jakaun kajinmina nunisarang winasha tuke kajinmatrinawai.

Tura asan wikia jakach ajapamua nunisketjai.

13 Aints nangkamiar wina pachitsar shishkamsar chichartinaun anturmamjai:

“Atu atu yantame itiurkachmin shamrumtin awai”.

Tu tinau asar,

aints untsuri wina mantuwartas chichaman najatrinawai.

14 Antsu wikia amin nintimsan pujajme.

Apuru wikia aminka tuke:

Ameketme Yusur tinuyajme.

15 Wina pujutruka aminuitai.

Wina nemasur ainau wina papeetkar mantuwartas wakerutinamtaisha angkanmamtikruata.

16 Wikia ami inatirmetjai.

Tura nekas pengker asam jiirsata.

Tura wait anentruram uwemtikrurta.

17 Apuru amin untsuajme.

Wi seamsha inatsturaip.

Antsu pasé aints ainau inatsaarta.

Tura iwiarsamu ainau chichatsuk pujuinawa nunisarang pujusarti tusam itiatmamtikiata.

18 Chikich wait chichaman chichau ainau anangkartichu ainaun pachisar wishikinak:

Nuka mianchawaitai tusar,

pasé chichaina nu amek itiatmamtikiata.

19 Antsu amin umirtamin ainauka nekasam timiá aneame.

Mash aints ainau wainminamunum amin nekasampita turamin ainau anengkratairum nekamtikiatasam inaktusume.

20 Ame tuke pujau asam,

amin umirtamin ainaun chikich aints ainau pasé awajsarai tusam ejaktinuitme.

Ami aintsrum ainau wainkau asam,

ni nemase ainau niin pachisar pasé chicharkarai tusam surimiame.

21 Apuru wi wake mesekan pujai,

wina wait anentrakum pengker awajtusu asakmin,

nekasam pengkeraitme tajame.

22 Yusru wikia itiurkachmin pujamtai,

ame winaka ajapruam ukurkimiame timiajai.

Antsu wi yainkata tusan untsummatai, wina untsummaur anturtukmame.

23 Yus umirkautiram atumi Apuri aneetaram.

Ni umirkau ainautinka ii Apuringkia waitmaji.

Antsu miajuitjai tumamin ainaunka ni wait wajaktintrin susatnuitai.

24 Atumi Yusri nekasampita tau asaram,

napchauka nintimtsuk antsu pengker nintimsaram pujustaram.